നടി തൃഷയ്‌ക്കെതിരായ വിവാദ പരാമർശവുമായി ബന്ധപ്പെട്ട കേസിൽ അറസ്റ്റിലായ തമിഴ്നാട് പ്രതിപക്ഷ നേതാവ് ഉദയനിധി സ്റ്റാലിന് ആശ്വാസമായി മദ്രാസ് ഹൈക്കോടതിയുടെ ഇടപെടൽ. ചോദ്യം ചെയ്യലിന് ശേഷം സ്റ്റേഷൻ ജാമ്യത്തിൽ വിട്ടയക്കണമെന്ന് കോടതി പോലീസിനോട് നിർദേശിച്ചു.
കേസിന്റെ തുടർ അന്വേഷണത്തിൽ പൂർണമായി സഹകരിക്കണമെന്ന് ഉദയനിധിയോട് കോടതി നിർദേശിച്ചു. അദ്ദേഹത്തെ കസ്റ്റഡിയിൽ വാങ്ങി റിമാൻഡ് ചെയ്യാനുള്ള നീക്കമില്ലെന്നും, ചോദ്യം ചെയ്യൽ പൂർത്തിയാക്കിയ ശേഷം ജാമ്യത്തിൽ വിടാനാണ് തീരുമാനമെന്നും പ്രോസിക്യൂഷൻ കോടതിയെ അറിയിച്ചു.
തഞ്ചാവൂർ പോലീസ് രജിസ്റ്റർ ചെയ്ത കേസിൽ സ്ത്രീയെ അപമാനിക്കൽ, അശ്ലീല പരാമർശം, കലാപത്തിന് പ്രേരണ, ഭീഷണിപ്പെടുത്തൽ, സ്ത്രീപീഡന വിരുദ്ധ നിയമപ്രകാരമുള്ള കുറ്റങ്ങൾ ഉൾപ്പെടെ ഒമ്പത് വകുപ്പുകളാണ് ചുമത്തിയിരിക്കുന്നത്. നടൻ വിജയിയുടെ പാർട്ടിയായ തമിഴക വെറ്റ്രി കഴകം തഞ്ചാവൂർ പോലീസിലും ദേശീയ വനിതാ കമ്മീഷനിലും പരാതി നൽകിയതിനെ തുടർന്നാണ് നടപടി.
പോലീസ് കസ്റ്റഡിയിലേക്ക് കൊണ്ടുപോകുന്നതിനിടെ മാധ്യമങ്ങളോട് പ്രതികരിച്ച ഉദയനിധി, താൻ പ്രസംഗത്തിൽ മുഖ്യമന്ത്രിയെ ഒഴികെ മറ്റാരുടെയും പേര് പരാമർശിച്ചിട്ടില്ലെന്നും, ബാക്കി കാര്യങ്ങൾ കോടതി തീരുമാനിക്കട്ടെയെന്നും പറഞ്ഞു.
ഉദയനിധിയുടെ അറസ്റ്റിനെതിരെ തമിഴ്നാട്ടിന്റെ വിവിധ ഭാഗങ്ങളിൽ ഡി.എം.കെ. പ്രവർത്തകർ പ്രതിഷേധ പ്രകടനങ്ങൾ നടത്തി. കേസിന്റെ തുടർനടപടികൾ കോടതിയുടെ പരിഗണനയിലാണ്.
