ബെംഗളൂരുവിൽ 2026 ജനുവരി മുതൽ ഓഗസ്റ്റ് വരെ പ്രധാനപ്പെട്ട അഞ്ച് ട്രാഫിക് നിയമലംഘനങ്ങളിലായി 24.54 ലക്ഷം കേസുകൾ രജിസ്റ്റർ ചെയ്തു. കഴിഞ്ഞ അഞ്ച് വർഷങ്ങളിലെ ഈ വിഭാഗങ്ങളിലെ മുഴുവൻ വർഷത്തെ കണക്കിനേക്കാളും കൂടുതലാണിത്.
ജനുവരി–ഓഗസ്റ്റ് കാലയളവിൽ 10.99 ലക്ഷം തെറ്റായ പാർക്കിങ് കേസുകളാണ് രജിസ്റ്റർ ചെയ്തത്. ഇതിന് പുറമെ ഫുട്പാത്തിൽ വാഹനങ്ങൾ പാർക്ക് ചെയ്തതിന് 1.16 ലക്ഷം കേസുകളും എടുത്തു. പ്രധാന അഞ്ച് നിയമലംഘനങ്ങളിൽ സിഗ്നൽ ലംഘനം, നോ എൻട്രി, ഫുട്പാത്തിലൂടെ വാഹനമോടിക്കൽ, അപകടകരമായ ഡ്രൈവിങ് എന്നിവയും ഉൾപ്പെടുന്നു. ആറ് വർഷത്തെ കണക്കിൽ തെറ്റായ പാർക്കിങ്, സിഗ്നൽ ലംഘനം, നോ എൻട്രി എന്നിവയാണ് ഭൂരിഭാഗം കേസുകൾക്കും കാരണമായത്.
ഗതാഗത നിയമങ്ങൾ കർശനമായി നടപ്പാക്കുന്നതും നിയമലംഘനങ്ങൾ കണ്ടെത്താനുള്ള സംവിധാനങ്ങൾ മെച്ചപ്പെട്ടതുമാണ് കേസുകളുടെ വർധനവിന് ഒരു കാരണമെന്ന് കർണാടക പൊലീസ് മേധാവി ഡോ. എം.എ. സലീം ചൂണ്ടിക്കാട്ടി. അതേസമയം, വാഹനയാത്രക്കാരുടെ നിയമലംഘന പ്രവണതയും തുടരുന്നതായി അധികൃതർ പറയുന്നു.
2026 ജൂൺ വരെയുള്ള കണക്കിൽ ബെംഗളൂരുവിൽ ആകെ 58 ലക്ഷം ട്രാഫിക് നിയമലംഘന കേസുകൾ രജിസ്റ്റർ ചെയ്തതായി റിപ്പോർട്ടുണ്ടായിരുന്നു. 2025ൽ ആകെ 70 ലക്ഷം കേസുകളായിരുന്നു.
