ബെംഗളൂരു നഗരത്തിൽ ട്രാഫിക് പൊലീസ് പ്രത്യേക പരിശോധന ശക്തമാക്കി. മദ്യപിച്ച് വാഹനമോടിക്കൽ, അമിതവേഗം, ഹെൽമെറ്റും സീറ്റ് ബെൽറ്റും ധരിക്കാതെയുള്ള യാത്ര, മൊബൈൽ ഫോൺ ഉപയോഗിച്ച് വാഹനമോടിക്കൽ, തെറ്റായ പാർക്കിങ് തുടങ്ങിയ നിയമലംഘനങ്ങൾ കണ്ടെത്താനാണ് നഗരമൊട്ടാകെ പ്രത്യേക പരിശോധന നടത്തുന്നത്.
പ്രധാന ജംഗ്ഷനുകൾ, ഔട്ടർ റിങ് റോഡ്, എം.ജി. റോഡ്, കൊരമംഗല, ഇന്ദിരാനഗർ, വൈറ്റ്ഫീൽഡ്, ഇലക്ട്രോണിക് സിറ്റി, യെലഹങ്ക, ഹെബ്ബാൾ എന്നിവിടങ്ങളിലടക്കം പ്രത്യേക പരിശോധനാ സംഘങ്ങളെ വിന്യസിച്ചിട്ടുണ്ട്. രാത്രി വൈകിയും പരിശോധന തുടരുമെന്ന് ട്രാഫിക് പൊലീസ് അറിയിച്ചു.
മദ്യപിച്ച് വാഹനമോടിക്കുന്നവർക്കെതിരെ കേസെടുക്കുന്നതിനൊപ്പം ഡ്രൈവിംഗ് ലൈസൻസ് സസ്‌പെൻഡ് ചെയ്യുന്നതടക്കമുള്ള നടപടികളും സ്വീകരിക്കും. അമിതവേഗം, റെഡ് സിഗ്നൽ ലംഘിക്കൽ, അപകടകരമായ ഡ്രൈവിംഗ് എന്നിവ ക്യാമറകളുടെയും ഇ-എൻഫോഴ്‌സ്‌മെന്റ് സംവിധാനങ്ങളുടെയും സഹായത്തോടെയാണ് കണ്ടെത്തുന്നത്.
നിയമലംഘനം ആവർത്തിക്കുന്ന വാഹന ഉടമകൾക്കെതിരെ കൂടുതൽ കർശന നടപടി സ്വീകരിക്കുമെന്നും, വാഹനമോടിക്കുമ്പോൾ എല്ലാ ട്രാഫിക് നിയമങ്ങളും പാലിച്ച് സുരക്ഷിത യാത്ര ഉറപ്പാക്കണമെന്നും ബെംഗളൂരു ട്രാഫിക് പൊലീസ് പൊതുജനങ്ങളോട് അഭ്യർഥിച്ചു.
