ബെംഗളൂരുവിൽ രൂക്ഷമായേക്കാവുന്ന ജലക്ഷാമം മുൻകൂട്ടി കണ്ട് കർണാടകയും തമിഴ്നാടും കാവേരി നദിയിലെ ജലം കുടിവെള്ള ആവശ്യങ്ങൾക്ക് മാത്രം ഉപയോഗിക്കണമെന്ന് കാവേരി വാട്ടർ മാനേജ്മെന്റ് അതോറിറ്റി (CWMA) നിർദേശിച്ചു.
മഴയുടെ അളവ് ഗണ്യമായി കുറഞ്ഞതിനെ തുടർന്ന് കാവേരി നദിയിലേക്കുള്ള നീരൊഴുക്ക് സാധാരണയേക്കാൾ കുറവായതായി അതോറിറ്റി അറിയിച്ചു. ഇതുമൂലം അണക്കെട്ടുകളിലെ ജലനിരപ്പും താഴ്ന്നിരിക്കുകയാണ്.
കുടക്, ഹാസൻ, മൈസൂരു, രാമനഗര ജില്ലകളിൽ കഴിഞ്ഞ അഞ്ച് ആഴ്ചയായി ആവശ്യത്തിന് മഴ ലഭിക്കാത്തതാണ് കാവേരിയിലെ ജലലഭ്യത കുറയാൻ പ്രധാന കാരണമായി ചൂണ്ടിക്കാണിക്കുന്നത്. ഇതിൻ്റെ പ്രത്യാഘാതം ബെംഗളൂരുവിലെ കുടിവെള്ള വിതരണത്തെയും ബാധിക്കുമെന്ന ആശങ്ക ഉയർന്നിട്ടുണ്ട്.
നിലവിലുള്ള ജലശേഖരം അതീവ ജാഗ്രതയോടെ വിനിയോഗിച്ചാൽ കർണാടകയുടെയും തമിഴ്നാടിൻ്റെയും കുടിവെള്ള ആവശ്യങ്ങൾ നിറവേറ്റാൻ കഴിയുമെന്നാണ് അതോറിറ്റിയുടെ വിലയിരുത്തൽ. അതിനാൽ ജലത്തിൻ്റെ ദുരുപയോഗം ഒഴിവാക്കി മിതമായ ഉപഭോഗം ഉറപ്പാക്കണമെന്നും ബന്ധപ്പെട്ട വകുപ്പുകൾക്ക് നിർദേശം നൽകിയിട്ടുണ്ട്.
