ബെംഗളൂരുവിലെ നമ്മ മെട്രോ ഗ്രീൻ ലൈനിൽ ഇന്ന് രാത്രി ട്രെയിൻ സർവീസുകളിൽ താൽക്കാലിക മാറ്റം ഏർപ്പെടുത്തും. പുതിയ ട്രെയിൻ സെറ്റുകൾ സർവീസിൽ ഉൾപ്പെടുത്തുന്നതിന് മുന്നോടിയായി മെട്രോ റെയിൽ സുരക്ഷാ കമ്മീഷണർ (CMRS) നടത്തുന്ന പരിശോധനയുടെ ഭാഗമായാണ് ക്രമീകരണം.
യശ്വന്ത്പൂർ–മാധവര (മഡവര) ഭാഗത്തെ അപ് ലൈനിലാണ് പ്രധാനമായും മാറ്റം ബാധിക്കുക. രാത്രി 10.30 മുതൽ ദിവസത്തെ സർവീസ് അവസാനിക്കുന്നതുവരെ, ഈ ഭാഗത്ത് ട്രെയിനുകൾ സാധാരണ 10 മിനിറ്റ് ഇടവേളയ്ക്ക് പകരം 20 മിനിറ്റ് ഇടവേളയിലായിരിക്കും ഓടുക. അതേസമയം മാധവരയിൽ നിന്ന് സിൽക്ക് ഇൻസ്റ്റിറ്റ്യൂട്ട് ഭാഗത്തേക്കുള്ള ഡൗൺ ലൈൻ സർവീസ് സാധാരണ സമയക്രമം അനുസരിച്ച് തുടരും. അതിനാൽ മാറ്റം ഗ്രീൻ ലൈനിൻ്റെ മുഴുവൻ ഭാഗത്തെയും ബാധിക്കില്ല.
ഗ്രീൻ ലൈനിലെ തിരക്ക് കുറയ്ക്കുന്നതിനായി പുതിയ CRRC ട്രെയിൻ സെറ്റുകൾ ഉൾപ്പെടുത്തുന്നതിൻ്റെ ഭാഗമായാണ് പരിശോധനകൾ നടക്കുന്നത്. CMRS പരിശോധനയ്ക്ക് മുന്നോടിയായി ട്രെയിനുകളുടെ പരീക്ഷണ ഓട്ടവും നടത്തും. പുതിയ ട്രെയിനുകൾ ഘട്ടംഘട്ടമായി സർവീസിൽ എത്തുന്നതോടെ ഗ്രീൻ ലൈനിലെ ട്രെയിൻ ഫ്രീക്വൻസി മെച്ചപ്പെടുത്താനാണ് ലക്ഷ്യം
