സിന്ദൂർ ഓപ്പറേഷനിൽ 10 കുടുംബാംഗങ്ങൾ കൊല്ലപ്പെട്ടതായി ജെയ്ഷെ മുഹമ്മദ് മേധാവി മസൂദ് അസ്ഹർ പറഞ്ഞതായി റിപ്പോർട്ട്. പാക്കിസ്ഥാനിലെ 9 സ്ഥലങ്ങളിൽ ബുധനാഴ്‌ച പുലർച്ചെ ആരംഭിച്ച ഓപ്പറേഷൻ സിന്ദൂരിൻ്റെ ഭാഗമായി ഇന്ത്യ തീവ്രവാദികളുടെ അടിസ്ഥാന സൗകര്യങ്ങൾ തകർത്തു. ജെയ്ഷെ-ഇ-മുഹമ്മദ്, ലഷ്കർ-ഇ-തൊയ്ബ ഭീകരരുടെ കേന്ദ്രങ്ങളാണ് ഇന്ത്യ തകർത്തത്. ആക്രമണം സ്ഥിരീകരിച്ച് മസൂദ് അസ്ഹറിൻ്റെ സന്ദേശം മാധ്യമങ്ങൾ പുറത്തുവിട്ടിട്ടുണ്ട്.
ആക്രമണത്തിൽ കൊല്ലപ്പെട്ടവരിൽ 4 കുട്ടികളുണ്ടെന്നും പറഞ്ഞറിയിക്കാൻ കഴിയാത്ത ഞെട്ടലും സങ്കടവും ഉണ്ടെന്നും എന്നാൽ പിന്മാറില്ലെന്നും ഭയമോ പശ്ചാത്താപമോ ഇല്ലെന്നും സന്ദേശത്തിൽ പറയുന്നു. രക്തസാക്ഷികൾ മരിക്കുന്നില്ലെന്നാണ് അല്ലാഹു പറയുന്നതെന്നും കുടുംബത്തിലെ 10 പേർ അനുഗ്രഹീതരായെന്നും സന്ദേശത്തിൽ പറയുന്നു. ഓപ്പറേഷൻ സിന്ദൂരിൻ്റെ പ്രാഥമിക ലക്ഷ്യങ്ങളിലൊന്നായിരുന്നു ഇന്ത്യൻ അതിർത്തിയിൽ നിന്ന് 100 കിലോമീറ്റർ അകലെയുള്ള ബഹവൽപൂർ.
ഇന്ത്യയ്ക്കെതിരായ ഒന്നിലധികം ആക്രമണങ്ങൾക്ക് ഉത്തരവാദികളായ ജെയ്ഷെ മുഹമ്മദിൻ്റെ (ജെഎം) ആസ്ഥാനവും മസൂദ് അസ്ഹറിൻ്റെ ജന്മനാടും താവളവുമൊക്കെയാണ് ബഹവൽപൂർ. ഇന്ത്യൻ അതിർത്തിയിൽ നിന്ന് 30 കിലോമീറ്റർ അകലെയുള്ള മുരിദ്കെ, 2008 ലെ മുംബൈ ആക്രമണം നടത്തിയ തീവ്രവാദികളെ പരിശീലിപ്പിക്കാൻ ഉപയോഗിച്ചിരുന്ന ലഷ്കർ-ഇ-തൊയ്ബ (എൽഇടി) ക്യാമ്പാണ്.
