നടൻ പ്രകാശ് രാജിൻ്റെ പേര് വോട്ടർ പട്ടികയിൽ നിന്ന് നീക്കം ചെയ്തെന്ന ആരോപണം ബെംഗളൂരു സെൻട്രൽ സിറ്റി കോർപ്പറേഷൻ തള്ളി. അദ്ദേഹത്തിൻ്റെ പേര് പൂർണമായും വോട്ടർ പട്ടികയിൽ നിന്ന് നീക്കം ചെയ്തതല്ലെന്നും, പഴയ വിലാസത്തിൽ താമസിക്കുന്നില്ലെന്ന് പരിശോധനയിൽ കണ്ടെത്തിയതിനെ തുടർന്ന് ‘Shifted’ വിഭാഗത്തിൽ ഉൾപ്പെടുത്തിയതാണെന്നും അധികൃതർ വ്യക്തമാക്കി.
കർണാടകയിലെ Special Intensive Revision (SIR) നടപടികളുടെ ഭാഗമായി ബൂത്ത് ലെവൽ ഓഫീസർ (BLO) പ്രകാശ് രാജിൻ്റെ രജിസ്റ്റർ ചെയ്ത വിലാസത്തിൽ പരിശോധന നടത്തിയിരുന്നു. അയൽവാസികളോടും കെട്ടിട ഉടമയോടും നടത്തിയ പരിശോധനയിൽ പ്രകാശ് രാജ് ആ വിലാസത്തിൽ താമസിക്കുന്നില്ലെന്ന് സ്ഥിരീകരിച്ചതായാണ് അധികൃതരുടെ വിശദീകരണം. തുടർന്ന് അദ്ദേഹത്തിൻ്റെ പേര് ASDDO (Absent, Shifted, Dead, Duplicate and Others) പട്ടികയിൽ ‘Shifted’ ആയി രേഖപ്പെടുത്തി.
പ്രകാശ് രാജ് ഇപ്പോൾ മറ്റൊരു വിലാസത്തിലാണ് താമസിക്കുന്നതെങ്കിൽ, പുതിയ വിലാസത്തിൽ വോട്ടർ രജിസ്ട്രേഷൻ നടപടികൾ പൂർത്തിയാക്കാൻ Form 6 വഴി അപേക്ഷിക്കാമെന്നും അധികൃതർ അറിയിച്ചു. അതിനാൽ തൻ്റെ പേര് അന്യായമായി വോട്ടർ പട്ടികയിൽ നിന്ന് നീക്കം ചെയ്തെന്ന പ്രകാശ് രാജിൻ്റെ ആരോപണം പരിശോധനയിൽ ശരിയല്ലെന്ന് ബെംഗളൂരു സെൻട്രൽ സിറ്റി കോർപ്പറേഷൻ വ്യക്തമാക്കി.
