മുഖ്യ തെരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ട് നടത്തിയ പ്രതിഷേധത്തിനിടെ ഡൽഹി പൊലീസ് കസ്റ്റഡിയിലെടുത്ത പ്രതിപക്ഷ നേതാവ് പിണറായി വിജയനെയും ജോൺ ബ്രിട്ടാസ് എം.പിയെയും കെ.എൻ. ബാലഗോപാലിനെയും വിട്ടയച്ചു. രാവിലെ 10.30ന് കസ്റ്റഡിയിലെടുത്ത മൂവരെയും വൈകിട്ട് 6.30ഓടെയാണ് വിട്ടയച്ചത്.
വിട്ടയച്ചതിന് പിന്നാലെ പൊലീസ് നടപടിക്കെതിരെ പിണറായി വിജയൻ രൂക്ഷ വിമർശനമുയർത്തി. കസ്റ്റഡിയിലെടുത്ത ശേഷം മൂന്നര മണിക്കൂറോളം ചെറിയ വാഹനത്തിൽ റോഡിലൂടെ ചുറ്റിച്ചതായി അദ്ദേഹം പറഞ്ഞു. പൊലീസ് സ്റ്റേഷനിലെത്തിക്കാനാണെങ്കിൽ ഇത്രയും സമയം വേണ്ടിവന്നത് എന്തിനാണെന്ന് മനസ്സിലാകുന്നില്ലെന്നും ഇത് തികച്ചും വിചിത്രമായ അനുഭവമായിരുന്നെന്നും അദ്ദേഹം പ്രതികരിച്ചു. ഇതിനിടെ ഛത്രസാൽ സ്റ്റേഡിയത്തിൽ പത്തുമിനിറ്റോളം ചെലവഴിച്ചതായും അദ്ദേഹം പറഞ്ഞു.
രാജ്യത്ത് ജനാധിപത്യവിരുദ്ധ നടപടികൾക്കെതിരായ വികാരം ശക്തിപ്പെട്ടുവരികയാണെന്ന് പിണറായി വിജയൻ പറഞ്ഞു. പ്രതിഷേധത്തിൽ പങ്കാളിയാകാൻ കഴിഞ്ഞതിൽ അഭിമാനമുണ്ടെന്നും വരും ദിവസങ്ങളിൽ പ്രക്ഷോഭം കൂടുതൽ ശക്തിയാർജിക്കുമെന്നാണ് പ്രതീക്ഷയെന്നും അദ്ദേഹം കൂട്ടിച്ചേർത്തു.
ഉന്നത ഉദ്യോഗസ്ഥരുടെ നിർദേശപ്രകാരമാണ് പൊലീസ് ഇത്തരമൊരു സമീപനം സ്വീകരിച്ചതെന്നും പിണറായി ആരോപിച്ചു. വാഹനത്തിനുള്ളിൽ നല്ല രീതിയിൽ സംസാരിച്ചുവെന്നതുകൊണ്ട് പൊലീസിന്റെ നടപടിയെ ന്യായീകരിക്കാനാവില്ല. പ്രക്ഷോഭത്തെ അടിച്ചമർത്തുകയാണ് പൊലീസിന്റെ ലക്ഷ്യമെന്നും ഇത്തരം നടപടികൾകൊണ്ട് സമരത്തെ ഇല്ലാതാക്കാനാവില്ലെന്നും അദ്ദേഹം വ്യക്തമാക്കി. കൂടുതൽ ശക്തമായ പ്രതിഷേധം തുടർന്നുണ്ടാകുമെന്നും പിണറായി വിജയൻ പറഞ്ഞു.
