നോർക്ക ഇൻഷുറൻസ് പദ്ധതിയുടെ പ്രീമിയം തുക കുറച്ച് സാധാരണ പ്രവാസികൾക്ക് കൂടുതൽ പ്രയോജനകരമാക്കണമെന്നാവശ്യപ്പെട്ട് കേരള സമാജം ബാംഗ്ലൂർ നോർത്ത് വെസ്റ്റ് ഭാരവാഹികൾ കേരള മുഖ്യമന്ത്രി വി.ഡി.സതീശന് നിവേദനം നൽകി.

നവംബർ 18ന് തിരുവനന്തപുരത്തെ മുഖ്യമന്ത്രിയുടെ ഓഫീസിൽ വെച്ചാണ് സമാജം ഭാരവാഹികൾ കൂടിക്കാഴ്ച നടത്തി നിവേദനം സമർപ്പിച്ചത്. കേരള സമാജം ബാംഗ്ലൂർ നോർത്ത് വെസ്റ്റ് പ്രസിഡണ്ട് ആർ. മുരളീധർ, വൈസ് പ്രസിഡണ്ട് മാത്തുക്കുട്ടി ചെറിയാൻ, സെക്രട്ടറി അജിത് കുമാർ നായർ, കൺവീനർ അശോക് എം. എന്നിവർ നിവേദക സംഘത്തിലുണ്ടായിരുന്നു.

കർണാടകയിൽ നോർക്ക രജിസ്ട്രേഷൻ ലഭിച്ച ആദ്യത്തെ സംഘടനയാണ് കേരള സമാജം ബാംഗ്ലൂർ നോർത്ത് വെസ്റ്റ് എന്ന് നിവേദനത്തിൽ ചൂണ്ടിക്കാട്ടി. സംഘടനയിലൂടെ നിരവധി പ്രവാസികൾക്ക് നോർക്കയുടെ വിവിധ ആനുകൂല്യങ്ങൾ ലഭ്യമാക്കാൻ കഴിഞ്ഞിട്ടുണ്ടെന്നും ഭാരവാഹികൾ വ്യക്തമാക്കി.

നിലവിൽ നോർക്ക ഇൻഷുറൻസ് പദ്ധതിയുടെ പ്രീമിയം തുക മുൻ വർഷങ്ങളെ അപേക്ഷിച്ച് ഗണ്യമായി വർധിച്ചത് സാധാരണ പ്രവാസികൾക്ക് വലിയ സാമ്പത്തിക ബാധ്യതയാകുന്നുണ്ടെന്ന് നിവേദനത്തിൽ ചൂണ്ടിക്കാട്ടി. സാധാരണക്കാരായ പ്രവാസികൾക്കും പദ്ധതിയുടെ പ്രയോജനം ലഭിക്കുന്ന തരത്തിൽ പ്രീമിയം തുക പഴയ നിരക്കിലേക്ക് കുറയ്ക്കുകയോ കൂടുതൽ താങ്ങാനാകുന്ന രീതിയിൽ പുനഃക്രമീകരിക്കുകയോ ചെയ്യണമെന്നാണ് പ്രധാന ആവശ്യം.

പ്രവാസികളുടെ ക്ഷേമവും സുരക്ഷയും ഉറപ്പാക്കുന്ന പദ്ധതികൾ കൂടുതൽ ജനകീയമാക്കണമെന്നും സാമ്പത്തിക ബുദ്ധിമുട്ടുകൾ കാരണം അർഹരായവർക്ക് ഇൻഷുറൻസ് പരിരക്ഷ നഷ്ടപ്പെടുന്ന സാഹചര്യം ഒഴിവാക്കണമെന്നും സമാജം ഭാരവാഹികൾ ആവശ്യപ്പെട്ടു.

പ്രവാസി മലയാളികളുടെ ക്ഷേമപ്രവർത്തനങ്ങളിൽ സജീവമായി ഇടപെടുന്ന കേരള സമാജം ബാംഗ്ലൂർ നോർത്ത് വെസ്റ്റിൻ്റെ ഈ ഇടപെടൽ നോർക്ക ഇൻഷുറൻസ് പദ്ധതിയുടെ പ്രീമിയം പുനഃപരിശോധിക്കുന്നതിന് സഹായകരമാകുമെന്ന പ്രതീക്ഷയിലാണ് പ്രവാസി സമൂഹം.

Related Posts