കേരള കോൺഗ്രസ് ജോസഫ് വിഭാഗം നേതാവ് പി.ജെ. ജോസഫിനും പാലാ എംഎൽഎ മാണി സി. കാപ്പനും സുപ്രധാന പദവികൾ നൽകാൻ തീരുമാനം. പി.ജെ. ജോസഫിനെ കാർഷിക വികസന സമിതി ചെയർമാനായും മാണി സി കാപ്പനെ നോർക്ക വൈസ് ചെയർമാനായും നിയമിക്കാനാണ് ധാരണയായത്. ഇരുവർക്കും ക്യാബിനറ്റ് റാങ്കിലുള്ള പദവികൾ നൽകാനുള്ള തീരുമാനത്തിന് അടുത്ത മന്ത്രിസഭാ യോഗത്തിൽ അംഗീകാരം ലഭിക്കുമെന്നാണ് റിപ്പോർട്ട്.
ബോർഡ്-കോർപ്പറേഷൻ നിയമനങ്ങൾ നീണ്ടുപോകുന്നതിൽ യുഡിഎഫിലെ ഘടകകക്ഷികൾക്കിടയിൽ നേരത്തേ തന്നെ അതൃപ്തി ശക്തമായിരുന്നു. ചില ഘടകകക്ഷികൾ പരസ്യമായി പ്രതിഷേധം അറിയിക്കുകയും ചെയ്തിരുന്നു. ഈ സാഹചര്യത്തിൽ മുന്നണിക്കുള്ളിലെ അസ്വാരസ്യങ്ങൾ കൂടുതൽ രൂക്ഷമാകാതിരിക്കാനാണ് നിയമന നടപടികൾ വേഗത്തിലാക്കിയതെന്നാണ് വിലയിരുത്തൽ.
കേരള കോൺഗ്രസ് ജോസഫ് വിഭാഗത്തിൻ്റെ നിരന്തരമായ ആവശ്യത്തെ തുടർന്നാണ് പി.ജെ. ജോസഫിന് പദവി നൽകാൻ തീരുമാനിച്ചത്. നിയമനം വൈകുന്നതിൽ പാർട്ടിക്കുള്ളിൽ കടുത്ത അസംതൃപ്തിയുണ്ടായിരുന്നു. ഇതുമായി ബന്ധപ്പെട്ട് മന്ത്രി മോൻസ് ജോസഫ് മുഖ്യമന്ത്രിയുമായി ചർച്ച നടത്തുകയും ചെയ്തിരുന്നു.
അതേസമയം, തനിക്ക് അർഹമായ പരിഗണന ലഭിക്കുന്നില്ലെന്ന് ചൂണ്ടിക്കാട്ടി മാണി സി. കാപ്പനും മുഖ്യമന്ത്രിയെ നേരിൽക്കണ്ട് അതൃപ്തി അറിയിച്ചിരുന്നു. മറ്റ് ഘടകകക്ഷികൾക്ക് പരിഗണന നൽകിയപ്പോൾ തൻ്റെ പാർട്ടിയെ അവഗണിക്കുന്നുവെന്നായിരുന്നു കാപ്പൻ്റെ പരാതി. നോർക്ക വൈസ് ചെയർമാൻ പദവിക്കൊപ്പം ക്യാബിനറ്റ് റാങ്കും വേണമെന്ന ആവശ്യവും അദ്ദേഹം ഉന്നയിച്ചിരുന്നു.
ആർഎസ്പി ഉൾപ്പെടെയുള്ള ഘടകകക്ഷികൾ ബോർഡ്-കോർപ്പറേഷൻ നിയമനങ്ങൾ വൈകുന്നതിനെതിരെ നേരത്തേ രംഗത്തെത്തിയിരുന്നു. മുന്നണിയിലെ കക്ഷികൾക്കിടയിൽ നിലനിന്നിരുന്ന ഈ അസ്വാരസ്യങ്ങൾക്ക് പരിഹാരം കാണുന്നതിൻ്റെ ഭാഗമായാണ് പുതിയ തീരുമാനമെന്നാണ് രാഷ്ട്രീയ വിലയിരുത്തൽ.