ബംഗ്ലാദേശിനെ തകർത്ത് ഇന്ത്യ വനിതാ ഏഷ്യാകപ്പ് ഫൈനലിൽ. 40 റൺസിനാണ് ഇന്ത്യയുടെ വിജയം. തുടർച്ചയായ പത്താം തവണയാണ് ഇന്ത്യ ഏഷ്യാകപ്പ് ഫൈനലിൽ ഇടം നേടുന്നത്. ഞായറാഴ്ച നടക്കുന്ന ഫൈനലിൽ ശ്രീലങ്ക–പാക്കിസ്ഥാൻ സെമിഫൈനൽ മത്സരത്തിലെ വിജയിയെയാണ് ഇന്ത്യ നേരിടുക.
ആവേശകരമായ സെമിഫൈനൽ പോരാട്ടത്തിൽ ആദ്യം ബാറ്റ് ചെയ്ത ഇന്ത്യ നേടിയ 149 റൺസിനെതിരെ ബംഗ്ലാദേശിന് 20 ഓവറിൽ ഏഴ് വിക്കറ്റ് നഷ്ടത്തിൽ 109 റൺസെടുക്കാനേ കഴിഞ്ഞുള്ളൂ.
ടോസ് നേടി ആദ്യം ബാറ്റിങ്ങിനിറങ്ങിയ ഇന്ത്യക്ക് ഓപ്പണർ ഷെഫാലി വർമയുടെ തകർപ്പൻ അർധസെഞ്ചറിയാണ് കരുത്തായത്. 40 പന്തിൽ 64 റൺസ് നേടിയ ഷെഫാലി ഇന്ത്യൻ സ്കോർ ഉയർത്തുന്നതിൽ നിർണായക പങ്കുവഹിച്ചു. ക്യാപ്റ്റൻ ഹർമൻപ്രീത് കൗർ 24 റൺസും റിച്ച ഘോഷ് 21 റൺസും പ്രതീക റാവൽ 20 റൺസും നേടി. ബംഗ്ലാദേശിനായി സുൽത്താന ഖാത്തൂൻ രണ്ട് വിക്കറ്റ് വീഴ്ത്തി. മറൂഫ അക്തർ, നഹിദ അക്തർ, റബേയ ഖാത്തൂൻ എന്നിവർ ഓരോ വിക്കറ്റ് വീതവും നേടി.
149 റൺസ് വിജയലക്ഷ്യവുമായി ഇറങ്ങിയ ബംഗ്ലാദേശിന് ഇന്ത്യൻ ബൗളർമാർക്കെതിരെ കാര്യമായ മുന്നേറ്റം നടത്താനായില്ല. ഷൊർണ അക്തർ 18 പന്തിൽ പുറത്താകാതെ 22 റൺസുമായി ടോപ് സ്കോററായി. ദിലാറ അക്തർ 21, നിഗർ സുൽത്താന 19, ശോഭന മൊസ്താരി 18 റൺസ് വീതം നേടി. ഇന്ത്യയ്ക്കായി ദീപ്തി ശർമ മൂന്ന് വിക്കറ്റും നന്ദിനി ശർമ രണ്ട് വിക്കറ്റും വീഴ്ത്തി. ശ്രീചരണിക്കും പ്രേമ റാവത്തിനും ഓരോ വിക്കറ്റ് ലഭിച്ചു.
