ബെംഗളൂരു എം.ജി റോഡിലും പരിസര പ്രദേശങ്ങളിലും വാഹനങ്ങൾ പാർക്ക് ചെയ്യുന്നവരിൽ നിന്ന് നഗര കോർപ്പറേഷൻ നിശ്ചയിച്ച നിരക്കിനേക്കാൾ അധികം തുക ഈടാക്കുന്നതായി പരാതി. ഔദ്യോഗിക ബോർഡുകളിൽ രേഖപ്പെടുത്തിയ നിരക്കിൻ്റെ ഇരട്ടിയോളം തുക ചിലയിടങ്ങളിൽ ഈടാക്കുന്നതായാണ് വാഹന ഉടമകളുടെ ആരോപണം.
സെപ്റ്റംബർ 18ന് നൽകിയ ഒരു പാർക്കിങ് രസീതിൽ ഒരു മണിക്കൂർ ഇരുചക്രവാഹനം പാർക്ക് ചെയ്തതിന് ₹30 ഈടാക്കിയിട്ടുണ്ട്. എന്നാൽ കോർപ്പറേഷൻ സ്ഥാപിച്ച ബോർഡിൽ ഇരുചക്ര വാഹനങ്ങൾക്ക് മണിക്കൂറിന് ₹15യും കാറുകൾക്ക് ₹30യുമാണ് നിരക്ക് രേഖപ്പെടുത്തിയിരിക്കുന്നത്.
എം.ജി റോഡ്, ചർച്ച് സ്ട്രീറ്റ്, മ്യൂസിയം റോഡ് തുടങ്ങിയ മേഖലകളിലെ ഓൺ-റോഡ് പാർക്കിങ് നിയന്ത്രിക്കുന്നത് സ്വകാര്യ ഏജൻസിയായ എസ്.കെ ഇൻഫോടെക് ആണ്. 2025 സെപ്റ്റംബർ 12 മുതൽ 2028 സെപ്റ്റംബർ 12 വരെയാണ് കരാർ കാലാവധി. രണ്ട് വർഷത്തേക്ക് കൂടി നീട്ടാനുള്ള വ്യവസ്ഥയുമുണ്ട്.
അധിക നിരക്ക് ഈടാക്കിയാൽ പരാതി നൽകാൻ വ്യക്തമായ സംവിധാനമില്ലെന്നാണ് വാഹന ഉടമകളുടെ മറ്റൊരു പരാതി. കൂടുതൽ റോഡുകളിലേക്ക് പെയ്ഡ് പാർക്കിങ് സംവിധാനം വ്യാപിപ്പിക്കാനുള്ള നീക്കത്തിനിടെയാണ് നിലവിലെ ക്രമക്കേട് സംബന്ധിച്ച ആരോപണം ഉയർന്നിരിക്കുന്നത്. വിഷയത്തിൽ കോർപ്പറേഷൻ കമ്മിഷണർ ജി. ജഗദീഷ് പ്രതികരിച്ചിട്ടില്ല.
