മണ്ഡല പുനർനിർണയവുമായി ബന്ധപ്പെട്ട് തമിഴ്‌നാട് മുഖ്യമന്ത്രി വിജയ് വിളിച്ചുചേർത്ത സർവകക്ഷിയോഗത്തിൽ നിന്ന് പ്രധാന പ്രതിപക്ഷ പാർട്ടികളായ ഡിഎംകെയും അണ്ണാ ഡിഎംകെയും ഉൾപ്പെടെയുള്ള കക്ഷികൾ വിട്ടുനിന്നു. ദക്ഷിണേന്ത്യൻ സംസ്ഥാനങ്ങളുടെ ലോക്സഭാ സീറ്റുകളുടെ എണ്ണം കുറയുമെന്ന ആശങ്കയ്ക്കിടെ, വിഷയത്തിൽ സംസ്ഥാനത്തിൻ്റെ സംയുക്ത നിലപാട് രൂപീകരിക്കുകയെന്ന ലക്ഷ്യത്തോടെയാണ് യോഗം വിളിച്ചത്.
എന്നാൽ കാവേരി ജലപ്രശ്നത്തിൽ നിന്ന് ജനശ്രദ്ധ തിരിച്ചുവിടാനുള്ള നീക്കമാണ് സർവകക്ഷിയോഗത്തിന് പിന്നിലെന്നാണ് ഡിഎംകെയും അണ്ണാ ഡിഎംകെയും ആരോപിച്ചത്. ഇതേത്തുടർന്നാണ് പ്രധാന കക്ഷികൾ യോഗത്തിൽ പങ്കെടുക്കാതിരുന്നത്. തമിഴ്നാട്ടിലെ ആകെ 57 എംപിമാരിൽ 37 പേരാണ് യോഗത്തിൽ നിന്ന് വിട്ടുനിന്നത്. ഡിഎംകെയുടെ 30 എംപിമാരും അണ്ണാ ഡിഎംകെയുടെ നാല് എംപിമാരും പി.എം.കെ, എം.എൻ.എം എന്നീ കക്ഷികളുടെ ഓരോ എംപിമാരുമാണ് യോഗത്തിൽ പങ്കെടുക്കാതിരുന്നത്.
അതേസമയം, കോൺഗ്രസിൻ്റെ 12 എംപിമാർ, വി.സി.കെ, സി.പി.ഐ, സി.പി.എം എന്നീ പാർട്ടികളിൽ നിന്നുള്ള രണ്ട് വീതം എംപിമാർ, എം.ഡി.എം.കെ, മുസ്ലിം ലീഗ് എന്നീ കക്ഷികളിൽ നിന്നുള്ള ഓരോ എംപിമാരും യോഗത്തിൽ പങ്കെടുത്തു.
മണ്ഡല പുനർനിർണയത്തിൻ്റെ ഭാഗമായി ദക്ഷിണേന്ത്യൻ സംസ്ഥാനങ്ങൾക്ക് പാർലമെന്റിലെ നിലവിലെ പ്രാതിനിധ്യം നഷ്ടപ്പെടാൻ സാധ്യതയുണ്ടെന്ന ആശങ്കയാണ് യോഗത്തിൽ പ്രധാനമായും ചർച്ച ചെയ്യാൻ ഉദ്ദേശിച്ചത്. ജനസംഖ്യാ അടിസ്ഥാനത്തിലുള്ള മണ്ഡല പുനർനിർണയം നടപ്പായാൽ ജനസംഖ്യ നിയന്ത്രിച്ച സംസ്ഥാനങ്ങൾക്ക് സീറ്റുകൾ കുറയുമെന്ന ആശങ്ക ദക്ഷിണേന്ത്യൻ സംസ്ഥാനങ്ങൾ നേരത്തെ തന്നെ ഉയർത്തിയിട്ടുണ്ട്.
മുഖ്യമന്ത്രി വിളിച്ചുചേർത്ത യോഗം അനാവശ്യവും കാവേരി വിഷയത്തിൽനിന്ന് ശ്രദ്ധതിരിക്കാനുള്ള ശ്രമവുമാണെന്ന് ഡിഎംകെ എംപി കനിമൊഴി പ്രതികരിച്ചു. അതേസമയം, മണ്ഡല പുനർനിർണയ വിഷയത്തിൽ ദക്ഷിണേന്ത്യൻ സംസ്ഥാനങ്ങൾ ഒറ്റക്കെട്ടായി നിലപാട് സ്വീകരിക്കേണ്ടതിൻ്റെ ആവശ്യകതയും ചർച്ചയിലുണ്ട്.
