ബെംഗളൂരുവിലെ ഗതാഗതക്കുരുക്ക് കുറയ്ക്കാൻ നിർണായകമായ സാറ്റലൈറ്റ് ടൗൺ റിങ് റോഡ് പദ്ധതിയുടെ നിർമ്മാണം അവസാനഘട്ടത്തിലേക്ക്. ആകെ ആറ് നിർമാണ പാക്കേജുകളിൽ നാലെണ്ണം പൂർത്തിയായതായും, ബാക്കി രണ്ട് ഭാഗങ്ങളുടെയും നിർമ്മാണം ഈ വർഷം തന്നെ പൂർത്തിയാക്കാൻ ലക്ഷ്യമിടുന്നതായും ദേശീയപാത അതോറിറ്റി അറിയിച്ചു.
ഏകദേശം 280 കിലോമീറ്റർ ദൈർഘ്യമുള്ള സാറ്റലൈറ്റ് ടൗൺ റിങ് റോഡ് ബെംഗളൂരുവിന് ചുറ്റുമുള്ള പ്രധാന ഉപനഗരങ്ങളെയും വ്യവസായ മേഖലകളെയും ബന്ധിപ്പിക്കുന്ന ആക്സസ്-കൺട്രോൾഡ് ദേശീയപാതയാണ്. ദൊബ്ബസ്പേട്ടെ, ദൊഡ്ഡബല്ലാപുര, ഹോസ്കോട്ടെ, ഹൊസൂർ തുടങ്ങിയ പ്രധാന മേഖലകളെ ഇത് ബന്ധിപ്പിക്കും.
നിലവിൽ ദൊബ്ബസ്പേട്ടെ–ഹോസ്കോട്ടെ ഭാഗം ഗതാഗതത്തിന് തുറന്നുകഴിഞ്ഞു. ഹോസ്കോട്ടെ–ഹൊസൂർ ഭാഗത്തെ അവസാന പ്രവൃത്തികൾ പുരോഗമിക്കുകയാണ്. റെയിൽവേ ഓവർബ്രിഡ്ജുമായി ബന്ധപ്പെട്ട അനുമതികൾ മൂലമാണ് ഈ ഭാഗത്ത് നേരത്തെ കാലതാമസം ഉണ്ടായത്.
പദ്ധതി പൂർത്തിയാകുന്നതോടെ നഗരത്തിനുള്ളിലൂടെ കടന്നുപോകുന്ന ചരക്ക് വാഹനങ്ങൾ ബെംഗളൂരു നഗരത്തിലേക്ക് പ്രവേശിക്കാതെ റിങ് റോഡിലൂടെ സഞ്ചരിക്കാൻ കഴിയും. ഇതുവഴി നഗരത്തിലെ ഗതാഗതക്കുരുക്ക് കുറയുകയും യാത്രാസമയം ലാഭിക്കപ്പെടുകയും ഇന്ധനച്ചെലവും മലിനീകരണവും കുറയുകയും ചെയ്യുമെന്ന് അധികൃതർ പ്രതീക്ഷിക്കുന്നു. കൂടാതെ ദേവനഹള്ളി, ഹോസ്കോട്ടെ, നെലമംഗള, സാർജാപുര തുടങ്ങിയ ഉപനഗരങ്ങളുടെ വികസനത്തിനും സാറ്റലൈറ്റ് ടൗൺ റിങ് റോഡ് വലിയ പ്രചോദനമാകുമെന്നാണ് വിലയിരുത്തൽ.
