ബാങ്കിങ് മേഖലയിലെ യൂണിയനുകൾ സെപ്റ്റംബർ 11 വെള്ളിയാഴ്ച രാജ്യവ്യാപകമായി പണിമുടക്കും. സേവന വ്യവസ്ഥകൾ ഉൾപ്പെടെയുള്ള വിവിധ ആവശ്യങ്ങളിൽ സർക്കാരുമായി നടത്തിയ ചർച്ചകൾ തീരുമാനമാകാതെ പിരിഞ്ഞതോടെയാണ് പണിമുടക്കുമായി മുന്നോട്ടുപോകാൻ യൂണിയനുകൾ തീരുമാനിച്ചത്. ആഴ്ചയിൽ അഞ്ച് ദിവസം പ്രവൃത്തിദിനം എന്ന ആവശ്യത്തിൽ അനുകൂലമായ തീരുമാനമോ വ്യക്തമായ സമയപരിധിയോ പ്രഖ്യാപിക്കാത്ത സാഹചര്യത്തിൽ സമരത്തിൽനിന്ന് പിന്മാറില്ലെന്ന് യുണൈറ്റഡ് ഫോറം ഓഫ് ബാങ്ക് യൂണിയൻസ് (UFBU) വ്യക്തമാക്കി.
ചീഫ് ലേബർ കമ്മിഷണറുടെ (കേന്ദ്ര) ഓഫീസിൽ നടന്ന ചർച്ചയിൽ UFBU, ഇന്ത്യൻ ബാങ്ക്സ് അസോസിയേഷൻ (IBA), ഫിനാൻഷ്യൽ സർവീസസ് ഡിപ്പാർട്ട്മെന്റ് (DFS), ലേബർ അധികൃതർ എന്നിവരുടെ പ്രതിനിധികൾ പങ്കെടുത്തു. സെപ്റ്റംബർ 11 മുതൽ ഡൽഹിയിൽ നടക്കുന്ന ബ്രിക്സ് ഉച്ചകോടി കണക്കിലെടുത്ത് പണിമുടക്ക് പിൻവലിക്കണമെന്ന് അധികൃതർ ആവശ്യപ്പെട്ടെങ്കിലും യൂണിയനുകൾ നിലപാടിൽ ഉറച്ചുനിന്നു.
അതേസമയം, പണിമുടക്കിനെ തുടർന്ന് അത്യാവശ്യ ബാങ്കിങ് സേവനങ്ങൾ ലഭ്യമാക്കാൻ പരമാവധി ശ്രമിക്കുമെന്ന് എസ്ബിഐ അറിയിച്ചു. പ്രധാനപ്പെട്ട ബാങ്കിങ് ഇടപാടുകൾ പണിമുടക്കിന് മുമ്പായി പൂർത്തിയാക്കാനും സാധ്യമാകുന്നിടത്ത് ഇന്റർനെറ്റ് ബാങ്കിങ് ഉൾപ്പെടെയുള്ള ഡിജിറ്റൽ സേവനങ്ങൾ ഉപയോഗിക്കാനും എസ്ബിഐ ഉപഭോക്താക്കളോട് നിർദേശിച്ചു.
