ദീപാവലി ആഘോഷങ്ങൾക്ക് കൂടുതൽ തിളക്കമേകി അമേരിക്കൻ തപാൽ വകുപ്പിൻ്റെ പുതിയ സമ്മാനം

ദീപാവലി ആഘോഷങ്ങൾക്ക് കൂടുതൽ തിളക്കമേകി അമേരിക്കൻ തപാൽ വകുപ്പിൻ്റെ പുതിയ സമ്മാനം. പ്രകാശത്തിൻ്റെ ഉത്സവമായ ദീപാവലിയെ ആദരിച്ച് യുണൈറ്റഡ് സ്റ്റേറ്റ്സ് പോസ്റ്റൽ സർവീസ് (USPS) പുതിയ ഫോറെവർ തപാൽ സ്റ്റാമ്പ് പുറത്തിറക്കി. ഇന്ത്യൻ കലാകാരിയായ സംഗീത ഭുതാഡ ഒരുക്കിയ മനോഹരമായ രംഗോലി ചിത്രമാണ് സ്റ്റാമ്പിൻ്റെ പ്രധാന ആകർഷണം. ദീപാവലിയെ പ്രമേയമാക്കി അമേരിക്കൻ തപാൽ വകുപ്പ് സ്റ്റാമ്പ് പുറത്തിറക്കുന്നത് ഇത് രണ്ടാം തവണയാണ്. 2016ലായിരുന്നു ആദ്യ സ്റ്റാമ്പ് പുറത്തിറക്കിയത്.

ഒക്ടോബർ 21ന് വാഷിങ്ടണിലെ ഇന്ത്യൻ എംബസിയിൽ നടന്ന ചടങ്ങിലാണ് പുതിയ സ്റ്റാമ്പ് ഔദ്യോഗികമായി പുറത്തിറക്കിയത്. അമേരിക്കയിലെ ഇന്ത്യൻ അംബാസഡർ വിനയ് മോഹൻ ക്വാത്ര, യുഎസ് തപാൽ വകുപ്പിൻ്റെ സീനിയർ വൈസ് പ്രസിഡണ്ട് ശിബാനി ഗംഭീർ, കലാകാരി സംഗീത ഭുതാഡ എന്നിവർ ചടങ്ങിൽ പങ്കെടുത്തു.

നീല, ഓറഞ്ച്, പച്ച, ചുവപ്പ്, വെള്ള തുടങ്ങിയ നിറങ്ങൾ ചേർത്തുള്ള മനോഹരമായ രംഗോലി ചിത്രമാണ് സ്റ്റാമ്പിൽ ഇടംപിടിച്ചിരിക്കുന്നത്. പർപ്പിൾ നിറത്തിലുള്ള പശ്ചാത്തലത്തിലാണ് ഈ കലാസൃഷ്ടി ഒരുക്കിയിരിക്കുന്നത്. ഏകദേശം 30 വർഷമായി രംഗോലി കലാരംഗത്ത് പ്രവർത്തിക്കുന്ന സംഗീത ഭുതാഡ ഇന്ത്യയിൽ ജനിച്ച് പിന്നീട് അമേരിക്കയിലെ ഹൂസ്റ്റൺ മേഖലയിൽ താമസമാക്കിയ കലാകാരിയാണ്.

നിറമുള്ള മണലും അന്നജം അടിസ്ഥാനമാക്കിയുള്ള വർണപ്പൊടികളും ഉപയോഗിച്ചാണ് രംഗോലി തയ്യാറാക്കിയത്. പരമ്പരാഗത ഇന്ത്യൻ കലാരൂപത്തെ അമേരിക്കയിലെ ലക്ഷക്കണക്കിന് ആളുകളിലേക്ക് എത്തിക്കുകയാണ് പുതിയ സ്റ്റാമ്പിലൂടെ ലക്ഷ്യമിടുന്നത്. രംഗോലി ചിത്രത്തിൻ്റെ ഫോട്ടോ പകർത്തിയത് ബിജയ് ദീക്ഷിതാണ്. ജെന്നിഫർ ആർനോൾഡാണ് സ്റ്റാമ്പ് രൂപകൽപ്പന ചെയ്തത്. വില്യം ജെ. ഗിക്കർ ആർട്ട് ഡയറക്ടറായും പ്രവർത്തിച്ചു.

20 സ്റ്റാമ്പുകൾ വീതമുള്ള ഷീറ്റുകളായാണ് പുതിയ സ്റ്റാമ്പ് വിൽപ്പനയ്ക്കെത്തുന്നത്. ആകെ രണ്ട് കോടി സ്റ്റാമ്പുകളാണ് അച്ചടിച്ചിരിക്കുന്നത്. ഫോറെവർ സ്റ്റാമ്പ് വിഭാഗത്തിൽ ഉൾപ്പെടുന്നതിനാൽ അമേരിക്കയിലെ ഫസ്റ്റ് ക്ലാസ് മെയിലിൻ്റെ ഒരു ഔൺസ് തപാൽ നിരക്കിന് തുല്യമായ മൂല്യം ഈ സ്റ്റാമ്പിന് തുടർന്നും ഉണ്ടായിരിക്കും. തപാൽ നിരക്ക് വർധിച്ചാലും വാങ്ങിയ സ്റ്റാമ്പിന്റെ ഉപയോഗമൂല്യം നിലനിൽക്കുമെന്നതാണ് ഇതിൻ്റെ പ്രത്യേകത.

ദീപാവലി ആഘോഷിക്കുന്നവർ വീടുകളിലും പരിസരങ്ങളിലും രംഗോലി ഒരുക്കുന്നത് ഐശ്വര്യത്തിൻ്റെയും സൗഭാഗ്യത്തിൻ്റെയും പ്രതീകമായാണ്. നിറമുള്ള അരിപൊടി, ചോക്ക്, പൂക്കളുടെ ഇതളുകൾ തുടങ്ങിയവ ഉപയോഗിച്ചാണ് പരമ്പരാഗതമായി രംഗോലി തയ്യാറാക്കുന്നത്. തിന്മയ്ക്കുമേൽ നന്മയും ഇരുട്ടിനുമേൽ വെളിച്ചവും വിജയം നേടുന്നതിൻ്റെ സന്ദേശമാണ് ദീപാവലി മുന്നോട്ടുവെക്കുന്നത്.

അമേരിക്കയിലെ ഇന്ത്യൻ വംശജരുടെ സാംസ്കാരിക പാരമ്പര്യത്തിനും ദീപാവലി ആഘോഷങ്ങൾക്കും ലഭിക്കുന്ന അംഗീകാരമായാണ് പുതിയ സ്റ്റാമ്പ് വിലയിരുത്തപ്പെടുന്നത്. 2016ലെ ആദ്യ സ്റ്റാമ്പിന് ശേഷം പത്തുവർഷം കഴിഞ്ഞാണ് ദീപാവലിക്ക് ആദരമായി രണ്ടാമത്തെ സ്റ്റാമ്പ് പുറത്തിറക്കുന്നത്.