ഇന്ത്യൻ ക്രിക്കറ്റിലെ മികച്ച പേസ് ബൗളർമാരിലൊരാളായ മുഹമ്മദ് ഷമി ടെസ്റ്റ് ക്രിക്കറ്റിൽ നിന്ന് വിരമിക്കൽ പ്രഖ്യാപിച്ചു. ടെസ്റ്റ് ക്രിക്കറ്റ് തൻ്റെ ജീവിതത്തിൽ ഒരു കളിയുടെ ഫോർമാറ്റ് മാത്രമായിരുന്നില്ലെന്നും ഹൃദയത്തോട് ചേർന്നുനിൽക്കുന്ന പ്രത്യേക ഇടമായിരുന്നുവെന്നുമാണ് വിരമിക്കൽ പ്രഖ്യാപനത്തിനൊപ്പം താരം കുറിച്ചത്. വൈകാരികമായ കുറിപ്പിലൂടെയാണ് ഷമി ചുവപ്പുപന്ത് ക്രിക്കറ്റിനോട് വിടപറഞ്ഞത്.
ഇന്ത്യൻ ടെസ്റ്റ് ടീമിൻ്റെ ബൗളിങ് നിരയിൽ നിർണായക സാന്നിധ്യമായിരുന്നു ഷമി. 64 ടെസ്റ്റ് മത്സരങ്ങളിൽ ഇന്ത്യയെ പ്രതിനിധീകരിച്ച താരം 27.71 ശരാശരിയിൽ 229 വിക്കറ്റുകൾ സ്വന്തമാക്കി. അഞ്ച് തവണ അഞ്ച് വിക്കറ്റ് നേട്ടവും കൈവരിച്ചു. 56 റൺസ് വഴങ്ങി അഞ്ച് വിക്കറ്റ് വീഴ്ത്തിയതാണ് ടെസ്റ്റിലെ മികച്ച ബൗളിങ് പ്രകടനം.
2013 നവംബർ ആറിന് കൊൽക്കത്തയിൽ വെസ്റ്റ് ഇൻഡീസിനെതിരെയായിരുന്നു ഷമിയുടെ ടെസ്റ്റ് അരങ്ങേറ്റം. 2023ലെ ലോക ടെസ്റ്റ് ചാമ്പ്യൻഷിപ്പ് ഫൈനലിലാണ് അവസാനമായി ഇന്ത്യൻ ടെസ്റ്റ് ജഴ്സിയിൽ കളിച്ചത്. പിന്നീട് ടെസ്റ്റ് ടീമിൽ ഇടം ലഭിച്ചിരുന്നില്ല. ഏകദിന, ട്വന്റി20 മത്സരങ്ങളിൽ താരം തുടർന്നും കളിച്ചേക്കും.
2023ലെ ഏകദിന ലോകകപ്പിലും ഷമി തൻ്റെ ബൗളിങ് മികവ് കൊണ്ട് ശ്രദ്ധേയനായിരുന്നു. ഏഴ് മത്സരങ്ങളിൽ നിന്ന് 24 വിക്കറ്റുകൾ വീഴ്ത്തിയ താരം ടൂർണമെന്റിലെ ഏറ്റവും കൂടുതൽ വിക്കറ്റ് നേടിയ ബൗളറായി മാറി. ഇന്ത്യൻ ടീമിന്റെ ലോകകപ്പ് മുന്നേറ്റത്തിൽ ഷമിയുടെ പ്രകടനം നിർണായകമായിരുന്നു.
ടെസ്റ്റ് ക്രിക്കറ്റിൽ രാജ്യത്തെ പ്രതിനിധീകരിക്കാൻ അവസരം നൽകിയ ബിസിസിഐയ്ക്കും ബംഗാൾ ക്രിക്കറ്റ് അസോസിയേഷനും കുടുംബാംഗങ്ങൾക്കും സുഹൃത്തുക്കൾക്കും ആരാധകർക്കും താരം നന്ദി അറിയിച്ചു.
വിരമിക്കൽ സന്ദേശത്തിൽ ടെസ്റ്റ് ക്രിക്കറ്റിനോടുള്ള തൻ്റെ ആത്മബന്ധം വ്യക്തമാക്കിക്കൊണ്ട് ഷമി കുറിച്ച വാക്കുകൾ ഇങ്ങനെ:
“ടെസ്റ്റ് ക്രിക്കറ്റിലെ എൻ്റെ അവസാന പന്തും ഞാൻ എറിഞ്ഞുകഴിഞ്ഞു. നന്ദി, ടെസ്റ്റ് ക്രിക്കറ്റ്…”
