ഡി.കെ.ശിവകുമാറിനെ പിന്തുണയ്ക്കുന്ന എംഎൽഎമാരുടെ സംഘം ഡൽഹിയിൽ; ലക്ഷ്യം മുഖ്യമന്ത്രിപദമോ?

കർണാടക സർക്കാർ രണ്ടര വർഷം പിന്നിടുമ്പോൾ, ഡി.കെ.ശിവകുമാറിനെ പരസ്യമായി പിന്തുണയ്ക്കുന്ന കർണാടക കോൺഗ്രസ് എംഎൽഎമാരുടെ ഒരു സംഘം ഡൽഹിയിൽ എത്തി. സംസ്ഥാനത്ത് ഭരണമാറ്റം സംബന്ധിച്ച അഭ്യൂഹങ്ങൾ വീണ്ടും ചർച്ചയായിരിക്കുന്നതിനിടയിലാണ് ഈ നീക്കം. കർണാടക സർക്കാരിലെ നേതൃമാറ്റത്തെക്കുറിച്ചുള്ള അഭ്യൂഹം മാസങ്ങളായി ഭരണകക്ഷിയായ കോൺഗ്രസിനെ അലട്ടിയിരുന്നു. ഇതിനിടയിലാണ് ഡി കെ ശിവകുമാർ പക്ഷത്തെ എംഎൽഎ മാർ ഡൽഹിയിൽ ക്യാമ്പ് ചെയ്യുന്നത്. വളരെയേറെ രാഷ്ട്രീയ സ്വാധീനമുള്ള വൊക്കലിഗ സമുദായത്തിൽ നിന്നുള്ള എം.എൽ.എമാരും സംഘത്തിൽ ഉൾപ്പെടുന്നു എന്നത് ശ്രദ്ധേയമാണ്. 100 ​​കോൺഗ്രസ് എംഎൽഎമാർ ഡികെഎസിനെ പിന്തുണയ്ക്കുമെന്ന് പറഞ്ഞ രാമനഗര എംഎൽഎ ഇഖ്ബാൽ ഹുസൈനും സംഘത്തിലുണ്ട്.