നഗരത്തിൻ്റെ വിവിധ ഭാഗങ്ങളിൽ ദിവസങ്ങളോളം നീണ്ടുനിന്ന ഏകോപിത പരിശോധനകളിൽ 6.30 കോടി രൂപ വിലമതിക്കുന്ന മയക്കുമരുന്ന് പിടിച്ചെടുത്ത് ബെംഗളൂരു സിറ്റി പോലീസ്. സംഭവങ്ങളുമായി ബന്ധപ്പെട്ട് രണ്ട് വിദേശികളടക്കം 34 പേരെ അറസ്റ്റ് ചെയ്തു. പിടിയിലായവരിൽ ഒമ്പത് പേർ മറ്റു സംസ്ഥാനങ്ങളിൽനിന്നുള്ളവരും 23 പേർ കർണാടക സ്വദേശികളുമാണ്.
5.519 കിലോഗ്രാം എം.ഡി.എം.എ, 46.486 കിലോഗ്രാം കഞ്ചാവ്, 72.82 ഗ്രാം കൊക്കെയ്ൻ, 1.542 ലിറ്റർ ഹാഷിഷ് ഓയിൽ എന്നിവയാണ് വിവിധ പരിശോധനകളിൽ പിടിച്ചെടുത്തത്. മയക്കുമരുന്ന് കടത്തിന് ഉപയോഗിച്ചതായി കരുതുന്ന എട്ട് മൊബൈൽ ഫോണുകളും രണ്ട് ഇരുചക്രവാഹനങ്ങളും 1,000 രൂപയും പോലീസ് കസ്റ്റഡിയിലെടുത്തു.
അജ്ഞാതരായ ആഭ്യന്തര, വിദേശ ഉറവിടങ്ങളിൽനിന്ന് കുറഞ്ഞ വിലയ്ക്ക് മയക്കുമരുന്ന് വാങ്ങി ഉയർന്ന വിലയ്ക്ക് പൊതുജനങ്ങൾക്കും കോളജ് വിദ്യാർഥികൾക്കും വിൽക്കുകയായിരുന്നു പ്രതികളെന്നാണ് പോലീസിൻ്റെ കണ്ടെത്തൽ. അറസ്റ്റിലായ 34 പേരെയും കോടതി റിമാൻഡ് ചെയ്ത് ജുഡീഷ്യൽ കസ്റ്റഡിയിൽ വിട്ടു. മയക്കുമരുന്ന് എത്തിച്ചുനൽകിയവരെ കണ്ടെത്താനുള്ള അന്വേഷണം തുടരുകയാണെന്ന് പോലീസ് അറിയിച്ചു.
പ്രധാന പിടിച്ചെടുക്കലുകൾ
- ഹെബ്ബാൾ പോലീസ്: മൂന്ന് കേസുകളിലായി 3.114 കിലോഗ്രാം എം.ഡി.എം.എയും 9.321 കിലോഗ്രാം കഞ്ചാവും പിടിച്ചെടുത്തു. ഏകദേശ മൂല്യം 3.16 കോടി രൂപ.
- കോറമംഗല പോലീസ്: 841 ഗ്രാം എം.ഡി.എം.എ പിടിച്ചെടുത്തു. മൂല്യം 84.10 ലക്ഷം രൂപ.
- ഗോവിന്ദപുര പോലീസ്: 17 കിലോഗ്രാം കഞ്ചാവ് പിടിച്ചെടുത്തു. മൂല്യം 8.50 ലക്ഷം രൂപ.
- ബേഗൂർ പോലീസ്: മൂന്ന് കേസുകളിലായി 13.75 കിലോഗ്രാം കഞ്ചാവ് പിടിച്ചെടുത്തു. മൂല്യം 6.87 ലക്ഷം രൂപ.
- യെശ്വന്ത്പുര പോലീസ്: 72.82 ഗ്രാം കൊക്കെയ്ൻ പിടിച്ചെടുത്തു. മൂല്യം 36.50 ലക്ഷം രൂപ.
നഗരത്തിലെ മയക്കുമരുന്ന് വിതരണ ശൃംഖല തകർക്കുന്നതിനായി പരിശോധനകൾ ശക്തമാക്കുമെന്നും ലഹരിക്കടത്തിന് പിന്നിലുള്ളവരെ കണ്ടെത്തുമെന്നും പോലീസ് വ്യക്തമാക്കി.
