വ്യാജവാർത്തകളും തെറ്റിദ്ധരിപ്പിക്കുന്ന വിവരങ്ങളും പ്രചരിപ്പിച്ച് സാമൂഹിക ഐക്യം തകർക്കാൻ ശ്രമിച്ചെന്നാരോപിച്ച് കർണാടക ആഭ്യന്തരമന്ത്രി പ്രിയങ്ക് ഖാർഗെയ്‌ക്കെതിരെ പരാതി. രാഷ്ട്രീയ സ്വയംസേവക് സംഘിനെ (ആർഎസ്എസ്) വെടിയുണ്ട വേട്ടയുമായി ബന്ധപ്പെടുത്തി സമൂഹമാധ്യമമായ എക്സിൽ പോസ്റ്റിട്ടെന്നാരോപിച്ചാണ് പരാതി നൽകിയിരിക്കുന്നത്.
തേജസ് എ. ഗൗഡയാണ് ചൊവ്വാഴ്ച ബനശങ്കരി പൊലീസ് സ്റ്റേഷനിൽ പരാതി നൽകിയത്. സംഭവത്തിൽ പ്രിയങ്ക് ഖാർഗെയ്‌ക്കെതിരെ എഫ്ഐആർ രജിസ്റ്റർ ചെയ്ത് അന്വേഷണം നടത്തണമെന്നാണ് പരാതിയിലെ ആവശ്യം.
ബിഹാർ, ഹരിയാന സംസ്ഥാനങ്ങളിൽനിന്ന് ഏകദേശം 44,250 ലൈവ് വെടിയുണ്ടകൾ പിടിച്ചെടുത്ത സംഭവവുമായി ആർഎസ്എസിനെ ബന്ധപ്പെടുത്തുന്ന തരത്തിലാണ് മന്ത്രിയുടെ സമൂഹമാധ്യമ പോസ്റ്റെന്നാണ് പരാതിക്കാരൻ്റെ ആരോപണം.
മന്ത്രിയുടെ പ്രസ്താവനകളും സൂചനകളും ആർഎസ്എസ് സംഘടനയ്ക്ക് ക്രിമിനൽ പ്രവർത്തനങ്ങളുമായി ബന്ധമുണ്ടെന്ന പ്രതീതി സൃഷ്ടിക്കാൻ ലക്ഷ്യമിട്ടുള്ളതാണെന്ന് പരാതിയിൽ പറയുന്നു.
വിവരങ്ങൾ തെറ്റാണെന്ന് അറിഞ്ഞിട്ടും ആഭ്യന്തരമന്ത്രി മനഃപൂർവം അവ പ്രചരിപ്പിക്കുകയായിരുന്നുവെന്നും ഇത് സംസ്ഥാനത്തെ സാമുദായിക സൗഹാർദം തകർക്കാൻ ഇടയാക്കുമെന്നും പരാതിക്കാരൻ ആരോപിച്ചു.
നിയമവും ക്രമസമാധാനവും പൊതുസമാധാനവും സംരക്ഷിക്കേണ്ട ചുമതലയുള്ള ആഭ്യന്തരമന്ത്രി തന്നെ ഒരു സംഘടനയ്ക്കെതിരെ തെറ്റായ വിവരങ്ങൾ പ്രചരിപ്പിക്കുന്നത് ഗൗരവകരമായ വിഷയമാണെന്നും പരാതിയിൽ ചൂണ്ടിക്കാട്ടുന്നു.
കലാപത്തിന് പ്രേരണ നൽകുക, വിവിധ വിഭാഗങ്ങൾക്കിടയിൽ ശത്രുത വളർത്തുക, പൊതുജനങ്ങളിൽ കുഴപ്പമുണ്ടാക്കുന്ന പ്രസ്താവനകൾ നടത്തുക തുടങ്ങിയ കുറ്റങ്ങൾ ഉൾപ്പെടുന്ന ഭാരതീയ ന്യായ സംഹിതയിലെ 192, 196, 353 വകുപ്പുകൾ പ്രകാരം കേസെടുക്കണമെന്നാണ് ആവശ്യം. ലഭ്യമായ വിവരങ്ങളും തെളിവുകളും പരിഗണിച്ച് തിരിച്ചറിയാവുന്ന കുറ്റകൃത്യങ്ങൾ നടന്നതായി ബോധ്യപ്പെട്ടാൽ എഫ്ഐആർ രജിസ്റ്റർ ചെയ്യണമെന്നും പരാതിയിൽ ആവശ്യപ്പെട്ടിട്ടുണ്ട്.
രാഷ്ട്രീയ ഇടപെടലുകളില്ലാതെ നിഷ്പക്ഷവും നീതിയുക്തവുമായ അന്വേഷണം നടത്തണമെന്നും പരാതിക്കാരൻ ആവശ്യപ്പെട്ടു. മന്ത്രിയുടെ സമൂഹമാധ്യമ പോസ്റ്റുകളുമായി ബന്ധപ്പെട്ട ഇലക്ട്രോണിക് രേഖകൾ ശേഖരിക്കുക, ബിഹാർ, ഹരിയാന പൊലീസ് അധികൃതരുമായി ബന്ധപ്പെട്ട് വെടിയുണ്ടകൾ പിടിച്ചെടുത്ത കേസുകളുടെ വിശദാംശങ്ങൾ തേടുക, തെറ്റായ വിവരങ്ങൾ മനഃപൂർവം പ്രചരിപ്പിച്ചിട്ടുണ്ടോയെന്ന് പരിശോധിക്കുക തുടങ്ങിയ ആവശ്യങ്ങളും ഉന്നയിച്ചിട്ടുണ്ട്.
അതേസമയം, പരാതി ലഭിച്ചിട്ടുണ്ടെങ്കിലും ഇതുവരെ പ്രിയങ്ക് ഖാർഗെയ്‌ക്കെതിരെ എഫ്ഐആർ രജിസ്റ്റർ ചെയ്തിട്ടില്ലെന്ന് പൊലീസ് അറിയിച്ചു.
