മുഖ്യമന്ത്രി വി.ഡി. സതീശൻ്റെ വിവാദ ഹെലികോപ്റ്റർ യാത്രയുമായി ബന്ധപ്പെട്ട് സംസ്ഥാന പൊലീസ് മേധാവി റവാഡ ചന്ദ്രശേഖർ ലോകായുക്തയിൽ സത്യവാങ്മൂലം സമർപ്പിച്ചു. ഹെലികോപ്റ്റർ ഉപയോഗിച്ചതിൽ അഴിമതി നടന്നിട്ടില്ലെന്നും സർക്കാരിന് സാമ്പത്തിക നേട്ടമോ നഷ്ടമോ ഉണ്ടായിട്ടില്ലെന്നും സത്യവാങ്മൂലത്തിൽ വ്യക്തമാക്കുന്നു.
നിലമ്പൂരിലെ പ്രളയസാഹചര്യത്തിൽ മുഖ്യമന്ത്രി നടത്തിയ അടിയന്തര യാത്രയ്ക്കായി ചിപ്‌സൺ കമ്പനിയുടെ ഹെലികോപ്റ്റർ ലഭ്യമാക്കിയത് സർക്കാരിൻ്റെ നിർദേശപ്രകാരമാണെന്നാണ് ഡിജിപിയുടെ വിശദീകരണം. പൊതുപ്രവർത്തകനായ കെ.എം. ഷാജഹാൻ നൽകിയ പരാതിയിലാണ് പൊലീസ് മേധാവി ലോകായുക്തയ്ക്ക് മറുപടി നൽകിയത്. പരാതിയിലെ ആരോപണങ്ങൾ അടിസ്ഥാനരഹിതമാണെന്നും പരാതി തള്ളണമെന്നും ഡിജിപി ആവശ്യപ്പെട്ടിട്ടുണ്ട്.
അതേസമയം, ഹെലികോപ്റ്റർ യാത്രയുടെ മുഴുവൻ ചെലവും ഒരു സ്പോൺസറാണ് വഹിച്ചതെന്നായിരുന്നു മുഖ്യമന്ത്രി നേരത്തെ വാർത്താസമ്മേളനത്തിൽ പറഞ്ഞിരുന്നത്. സർക്കാർ ഖജനാവിൽനിന്ന് ഒരു രൂപ പോലും ചെലവഴിച്ചിട്ടില്ലെന്നും അദ്ദേഹം വ്യക്തമാക്കിയിരുന്നു.
എന്നാൽ ഡിജിപി സമർപ്പിച്ച സത്യവാങ്മൂലത്തിൽ സ്പോൺസറെക്കുറിച്ച് പരാമർശമില്ല. സർക്കാർ ആവശ്യപ്പെട്ടതനുസരിച്ചാണ് ചിപ്‌സൺ കമ്പനി ഹെലികോപ്റ്റർ ലഭ്യമാക്കിയതെന്ന് പറയുന്നുണ്ടെങ്കിലും അതിനുള്ള പണം നൽകിയത് ആരാണെന്നോ ചെലവിൻ്റെ വിശദാംശങ്ങളോ വ്യക്തമാക്കിയിട്ടില്ല. മുഖ്യമന്ത്രിയുടെ മുൻ വിശദീകരണവും ഡിജിപിയുടെ സത്യവാങ്മൂലവും തമ്മിലുള്ള ഈ വ്യത്യാസമാണ് വിവാദത്തിന് പുതിയ മാനം നൽകുന്നത്.
