ബംഗാൾ ഉൾക്കടലിൽ രൂപപ്പെട്ട ‘അർണബ്’ ചുഴലിക്കാറ്റ് ഭീഷണിയെ തുടർന്ന് ആന്ധ്രപ്രദേശിലും ഒഡീഷയിലും ജാഗ്രത ശക്തമാക്കി. ചുഴലിക്കാറ്റ് ഇന്ന് ആന്ധ്ര തീരത്ത് കരതൊടുമെന്നാണ് കാലാവസ്ഥാ വകുപ്പിൻ്റെ മുന്നറിയിപ്പ്. മണിക്കൂറിൽ 125–135 കിലോമീറ്റർ വേഗത്തിൽ കാറ്റ് വീശാനും വേഗം 150 കിലോമീറ്റർ വരെ ഉയരാനും സാധ്യതയുണ്ട്.
വിശാഖപട്ടണം, വിജയവാഡ, രാജമഹേന്ദ്രവരം വിമാനത്താവളങ്ങളിൽ വിമാന സർവീസുകൾ തടസ്സപ്പെട്ടു. ബെംഗളൂരു ഉൾപ്പെടെയുള്ള നഗരങ്ങളുമായി ബന്ധിപ്പിക്കുന്ന ചില വിമാനങ്ങളും റദ്ദാക്കിയിട്ടുണ്ട്. യാത്രക്കാർ വിമാനത്താവളത്തിലേക്ക് പുറപ്പെടുന്നതിന് മുമ്പ് സർവീസ് നില പരിശോധിക്കണമെന്ന് അധികൃതർ നിർദേശിച്ചു.
ചുഴലിക്കാറ്റ് മുന്നറിയിപ്പിനെ തുടർന്ന് ആന്ധ്രപ്രദേശിൽ ഒക്ടോബർ 27, 28 തീയതികളിലായി 53 ട്രെയിൻ സർവീസുകൾ റദ്ദാക്കി. വിജയവാഡ, മച്ചിലിപട്ടണം, കാക്കിനഡ, വിശാഖപട്ടണം തുടങ്ങിയ മേഖലകളിലെ ട്രെയിനുകളെയാണ് നടപടി ബാധിച്ചത്. യാത്രക്കാർ റെയിൽവേയുടെ ഔദ്യോഗിക അറിയിപ്പുകൾ പരിശോധിക്കണം.
