നന്മ മെട്രോയുടെ പിങ്ക് ലൈൻ പാതയിലെ കലേന അഗ്രഹാര–തവരേക്കരെ എലിവേറ്റഡ് ഭാഗത്തിന് അടുത്ത അഞ്ച് ദിവസത്തിനുള്ളിൽ പ്രവർത്തനാനുമതി ലഭിച്ചേക്കുമെന്ന് കർണാടക വികസനമന്ത്രി കൃഷ്ണ ബൈരെ ഗൗഡ അറിയിച്ചു. ഒക്ടോബർ 22ന് മെട്രോ നിർമാണപ്രവർത്തനങ്ങൾ വിലയിരുത്തിയ ശേഷമാണ് അദ്ദേഹം ഇക്കാര്യം വ്യക്തമാക്കിയത്.
7.5 കിലോമീറ്റർ ദൈർഘ്യമുള്ള ഈ പാതയിൽ കലേന അഗ്രഹാര, ഹുളിമാവ്, ഐഐഎംബി, ജെ.പി. നഗർ നാലാം ഘട്ടം, ജയദേവ ആശുപത്രി, തവരേക്കരെ എന്നിങ്ങനെ ആറ് സ്റ്റേഷനുകളാണുള്ളത്. സുരക്ഷാ പരിശോധനയിൽ ചൂണ്ടിക്കാട്ടിയ കാര്യങ്ങൾ പരിഹരിച്ചശേഷം കമ്മീഷണർ ഓഫ് മെട്രോ റെയിൽവേ സേഫ്റ്റിയുടെ അന്തിമ അനുമതി ലഭിക്കണം.
പാതയുടെ ഉദ്ഘാടന തീയതി നിശ്ചയിക്കാൻ കേന്ദ്രത്തോട് സംസ്ഥാന സർക്കാർ ആവശ്യപ്പെട്ടിട്ടുണ്ട്. അനുമതി ലഭിച്ചാൽ തെക്കൻ ബെംഗളൂരുവിലെ ബന്നാർഘട്ട റോഡ് മേഖലയിലുള്ള യാത്രക്കാർക്ക് മെട്രോ സൗകര്യം കൂടുതൽ പ്രയോജനപ്പെടും. ജയദേവ ആശുപത്രി സ്റ്റേഷനിൽ യെല്ലോ ലൈനുമായി ബന്ധപ്പെടാനും കഴിയും.
