ഏഷ്യൻ ഗെയിംസ് 2026ൽ മെഡൽ നേടിയ കർണാടക താരങ്ങൾക്കുള്ള പാരിതോഷികം കുത്തനെ ഉയർത്തി സംസ്ഥാന സർക്കാർ. സ്വർണ മെഡൽ ജേതാക്കൾക്ക് ഒരു കോടി രൂപ, വെള്ളി മെഡൽ ജേതാക്കൾക്ക് 75 ലക്ഷം രൂപ, വെങ്കല മെഡൽ ജേതാക്കൾക്ക് 50 ലക്ഷം രൂപ വീതമാണ് ഇനി നൽകുക. നേരത്തെ യഥാക്രമം 35 ലക്ഷം, 25 ലക്ഷം, 15 ലക്ഷം രൂപയായിരുന്നു പാരിതോഷികം.
ഏഷ്യൻ ഗെയിംസിൽ മെഡൽ നേടിയ എട്ട് കർണാടക താരങ്ങൾക്ക് ആകെ എട്ട് കോടി രൂപ പാരിതോഷികമായി ലഭിക്കും. വനിതാ ക്രിക്കറ്റിൽ സ്വർണം നേടിയ ശ്രേയാങ്ക പാട്ടീലിന് ഒരു കോടി രൂപ ലഭിക്കും. 4×400 മീറ്റർ വനിതാ റിലേയിൽ സ്വർണവും മിക്സഡ് റിലേയിൽ വെള്ളിയും നേടിയ എം.ആർ. പൂവമ്മയ്ക്ക് ആകെ 1.75 കോടി രൂപ ലഭിക്കും. ഗോൾഫിൽ സ്വർണം നേടിയ പ്രണവി എസ്. അരസിനും 1.75 കോടി രൂപ ലഭിക്കും.
വെള്ളി മെഡൽ നേടിയ അദിതി അശോകിനും തിലോത്തമ സെൻക്കും 75 ലക്ഷം രൂപ വീതം ലഭിക്കും. ബാഡ്മിന്റണിൽ വെങ്കലം നേടിയ ആയുഷ് ഷെട്ടിക്കും അത്‌ലറ്റിക്സിൽ വെങ്കലം നേടിയ സ്നേഹ എസ്.എസിനും 50 ലക്ഷം രൂപ വീതം നൽകും. പുരുഷ ഹോക്കി ടീമിൻ്റെ സ്വർണ മെഡൽ നേട്ടത്തിൽ പങ്കാളിയായ മോഹിത് എച്ച്.എസിനും ഒരു കോടി രൂപ ലഭിക്കും.
മെഡൽ ജേതാക്കൾക്ക് പുറമെ ഏഷ്യൻ ഗെയിംസിൽ കർണാടകയെ പ്രതിനിധീകരിച്ച 20 കായികതാരങ്ങൾക്കും അഞ്ച് ലക്ഷം രൂപ വീതം പ്രോത്സാഹനധനം നൽകാനും സർക്കാർ തീരുമാനിച്ചു. ഏഷ്യൻ ഗെയിംസിൽ പങ്കെടുക്കാൻ യോഗ്യത നേടിയത് തന്നെ വലിയ നേട്ടമാണെന്ന വിലയിരുത്തലിൻ്റെ അടിസ്ഥാനത്തിലാണ് ഈ തീരുമാനം.
കായികതാരങ്ങളുടെ ഭാവി സുരക്ഷ ഉറപ്പാക്കുന്നതിൻ്റെ ഭാഗമായി ഏഷ്യൻ ഗെയിംസ്, കോമൺവെൽത്ത് ഗെയിംസ് മെഡൽ ജേതാക്കൾക്ക് ഗ്രൂപ്പ് ബി തസ്തികകളിൽ നേരിട്ടുള്ള നിയമനത്തിനും അവസരം നൽകും. കൂടാതെ സംസ്ഥാന സർക്കാർ നേരിട്ടുള്ള നിയമനങ്ങളിൽ മികച്ച കായികതാരങ്ങൾക്ക് രണ്ട് ശതമാനം സംവരണം ഏർപ്പെടുത്തിയിട്ടുണ്ട്.
‘ഗുരി: ഒളിമ്പിക്സ്’ പദ്ധതിയുടെ ഭാഗമായി എം.ആർ. പൂവമ്മ, സ്നേഹ എസ്.എസ്, ശ്രേയാങ്ക പാട്ടീൽ, ശിൽപ കെ.എസ്.എന്നിവരെ ഉൾപ്പെടുത്തി. ഒളിമ്പിക്സ് പരിശീലനത്തിനും തയ്യാറെടുപ്പുകൾക്കുമായി ഇവർക്ക് 10 ലക്ഷം രൂപ വീതം പ്രോത്സാഹനധനവും ലഭിക്കും.
