ധർമ്മസ്ഥലയിൽ നിരവധി ദുരൂഹമരണങ്ങൾ നടന്നെന്ന ആരോപണവുമായി ബന്ധപ്പെട്ട അന്വേഷണത്തിൽ അസ്വാഭാവിക മരണങ്ങളുടെ ഔദ്യോഗിക രേഖകളിൽ 30 കേസുകളുടെ വ്യത്യാസം കണ്ടെത്തിയതായി പ്രത്യേക അന്വേഷണ സംഘം (എസ്‌ഐടി) റിപ്പോർട്ട്. 1998 മുതൽ 2014 വരെ ബെൽത്തങ്ങാടി പൊലീസ് സ്റ്റേഷൻ രേഖകളിൽ 1,480 അസ്വാഭാവിക മരണങ്ങളാണ് രേഖപ്പെടുത്തിയിട്ടുള്ളത്. എന്നാൽ സംസ്ഥാന ക്രൈം റെക്കോർഡ്സ് ബ്യൂറോ, ധർമ്മസ്ഥല ഗ്രാമപഞ്ചായത്ത് തുടങ്ങിയവയിൽ നിന്നുള്ള രേഖകളിൽ ഇതേ കാലയളവിൽ 1,510 കേസുകൾ കാണുന്നതായാണ് റിപ്പോർട്ട്.
ധർമ്മസ്ഥല പൊലീസ് സ്റ്റേഷൻ പരിധിയിലെ പരിശോധനയിൽ ഏഴ് തലയോട്ടികളും മനുഷ്യശരീരത്തിൻ്റെ മറ്റ് അസ്ഥികളും കണ്ടെത്തിയതായും എസ്‌ഐടി റിപ്പോർട്ടിൽ പറയുന്നു. ഇവയുടെ ലിംഗം, മരണകാരണം, തിരിച്ചറിയൽ എന്നിവ സംബന്ധിച്ച പരിശോധനകൾ നടത്തിയതായി റിപ്പോർട്ടുകൾ വ്യക്തമാക്കുന്നു.
സി.എൻ. ചിന്നയ്യയുടെ ആരോപണത്തെ തുടർന്ന് 2025 ജൂലൈയിലാണ് കർണാടക സർക്കാർ എസ്‌ഐടിയെ അന്വേഷണത്തിനായി നിയോഗിച്ചത്. ഡി.ജി.പി. പ്രണബ് മൊഹന്തിയുടെ നേതൃത്വത്തിലുള്ള സംഘം വിശദമായ അന്വേഷണം നടത്തി. 7,005 പേജുള്ള അന്തിമ റിപ്പോർട്ട് 2026 ജൂലൈയിൽ ബെൽത്തങ്ങാടി കോടതിയിൽ സമർപ്പിച്ചിരുന്നു. റിപ്പോർട്ടിൽ 255 സാക്ഷികളുടെ മൊഴികളും ഫോറൻസിക് റിപ്പോർട്ടുകളും 4 ടിബി ഡിജിറ്റൽ വിവരങ്ങളും ഉൾപ്പെടുന്നതായി റിപ്പോർട്ടുകളുണ്ട്.
അന്വേഷണത്തിനിടെ ഉയർന്ന നിരവധി ആരോപണങ്ങൾ പരിശോധിച്ച എസ്‌ഐടി, ചിന്നയ്യയുടെ ചില ആരോപണങ്ങൾ തെറ്റായിരുന്നുവെന്ന നിഗമനത്തിലേക്ക് എത്തിയതായി നേരത്തെ റിപ്പോർട്ടുകൾ പുറത്തുവന്നിരുന്നു.
