കേരള ആർടിസിയുടെ ബെംഗളൂരു–മലപ്പുറം വാരാന്ത്യ ഡീലക്സ് സ്പെഷൽ ബസ് സർവീസ് ഒക്ടോബർ 2 മുതൽ പുനരാരംഭിക്കും. പുതിയ ബസ് ലഭിച്ചതോടെയാണ് സർവീസ് വീണ്ടും തുടങ്ങുന്നത്. മലപ്പുറത്ത് നിന്ന് ബെംഗളൂരുവിലേക്കുള്ള ആദ്യ സർവീസ് ഒക്ടോബർ 1ന് ആരംഭിക്കും. ഹൊസൂർ, പാലക്കാട് വഴിയാണ് സർവീസ്. ടിക്കറ്റ് നിരക്ക് 728 രൂപ.
ബെംഗളൂരുവിൽ നിന്ന് വെള്ളി, തിങ്കൾ ദിവസങ്ങളിൽ വൈകിട്ട് 5.15ന് സാറ്റലൈറ്റ് ബസ് ടെർമിനലിൽ നിന്ന് ബസ് പുറപ്പെടും. ശാന്തിനഗർ 5.35, സിൽക്ക് ബോർഡ് 5.55, ഹൊസൂർ 7.00, കോയമ്പത്തൂർ പുലർച്ചെ 1.10, പാലക്കാട് 2.20, പെരിന്തൽമണ്ണ 3.30 എന്നീ സമയങ്ങളിൽ എത്തി പുലർച്ചെ 3.55ന് മലപ്പുറത്ത് എത്തും.
മലപ്പുറത്ത് നിന്ന് വ്യാഴം, ഞായർ ദിവസങ്ങളിൽ രാത്രി 8.55ന് സർവീസ് ആരംഭിക്കും. പെരിന്തൽമണ്ണ 9.20, പാലക്കാട് 10.30, ഹൊസൂർ പുലർച്ചെ 5.05 എന്നീ സമയങ്ങളിലൂടെ രാവിലെ 5.45ന് ബെംഗളൂരുവിലെത്തും.
രണ്ട് വർഷം മുൻപ് ആരംഭിച്ച വാരാന്ത്യ സർവീസ് മണ്ഡ്യയിൽ ബസ് അപകടത്തിൽപ്പെട്ടതിനെ തുടർന്ന് നിർത്തിവച്ചിരുന്നു. പുതിയ സർവീസ് പുനരാരംഭിക്കുന്നതോടെ ബെംഗളൂരുവിൽനിന്നും മലപ്പുറം, പെരിന്തൽമണ്ണ തുടങ്ങിയ മേഖലകളിലേക്കുള്ള യാത്രക്കാർക്ക് കൂടുതൽ സൗകര്യമാകും.
കഴിഞ്ഞ മാസം ആരംഭിച്ച പൊന്നാനി–ബെംഗളൂരു വാരാന്ത്യ സൂപ്പർ ഫാസ്റ്റ് സർവീസും മലപ്പുറം വഴിയാണ് കടന്നുപോകുന്നത്. മുക്കം, അരീക്കോട്, താമരശ്ശേരി വഴിയാണ് ഈ സർവീസ്. കർണാടക ആർടിസിക്ക് നിലവിൽ മലപ്പുറത്തേക്ക് നേരിട്ട് സർവീസ് ഇല്ലാത്തതിനാൽ ബെംഗളൂരുവിൽനിന്നുള്ള യാത്രക്കാർക്ക് പുതിയ സർവീസ് കൂടുതൽ പ്രയോജനപ്പെടും.
