മൂന്ന് ദിവസത്തെ ഔദ്യോഗിക സന്ദർശനത്തിനായി ചൈനീസ് പ്രസിഡണ്ട് ഷി ജിൻപിങ് അമേരിക്കയിലെത്തി. ബുധനാഴ്ച വൈകിട്ട് മേരിലാൻഡിലെ ജോയിന്റ് ബേസ് ആൻഡ്രൂസിൽ ഷിയും ചൈനീസ് പ്രഥമ വനിത പെങ് ലിയുയാനും എത്തി. യുഎസ് പ്രസിഡണ്ട് ഡോണൾഡ് ട്രംപും പ്രഥമ വനിത മെലാനിയ ട്രംപും ചേർന്നാണ് ഇരുവരെയും വിമാനത്താവളത്തിൽ സ്വീകരിച്ചത്.
വിദേശരാജ്യത്തലവനെ യുഎസ് പ്രസിഡണ്ട് നേരിട്ട് വിമാനത്താവളത്തിലെത്തി സ്വീകരിക്കുന്നത് അപൂർവമാണ്. ഷിയുടെ സന്ദർശനം യുഎസ്-ചൈന ബന്ധത്തിലെ നിർണായക വിഷയങ്ങൾ ചർച്ച ചെയ്യാനുള്ള ഉച്ചകോടിയുടെ ഭാഗമായാണ് നടക്കുന്നത്.
ചൈനീസ് കമ്മ്യൂണിസ്റ്റ് പാർട്ടി പൊളിറ്റിക്കൽ ബ്യൂറോ സ്റ്റാൻഡിങ് കമ്മിറ്റി അംഗം കായ് ക്വി, വിദേശകാര്യ മന്ത്രി വാങ് യി എന്നിവരുൾപ്പെടെയുള്ള ഉന്നതതല പ്രതിനിധി സംഘവും ഷിക്കൊപ്പമുണ്ട്.
വ്യാപാര ബന്ധം, തീരുവ, അപൂർവ ധാതുക്കൾ, ആർട്ടിഫിഷ്യൽ ഇന്റലിജൻസ്, സാങ്കേതികവിദ്യ, തായ്‌വാൻ സുരക്ഷ തുടങ്ങിയ വിഷയങ്ങൾ കൂടിക്കാഴ്ചയിൽ പ്രധാനമായി ചർച്ച ചെയ്യപ്പെടുമെന്നാണ് റിപ്പോർട്ടുകൾ. ഇരു രാജ്യങ്ങളും തമ്മിലുള്ള വ്യാപാര ധാരണയുടെ തുടർച്ചയും ചർച്ചകളിലെ പ്രധാന വിഷയമാണ്.
