കർണാടകയിലെ വോട്ടർപട്ടികയുടെ പ്രത്യേക തീവ്ര പരിശോധനയായ SIR നടപടിയിൽ ശാരീരികമായി നേരിട്ട് ഹാജരാകാൻ കഴിയാത്തവർക്ക് ആശ്വാസം. മുതിർന്ന പൗരന്മാർ, ഭിന്നശേഷിക്കാർ, രോഗികൾ, വിദേശത്തുള്ള വോട്ടർമാർ എന്നിവർക്ക് പകരം പ്രായപൂർത്തിയായ കുടുംബാംഗങ്ങൾക്ക് തിരഞ്ഞെടുപ്പ് ഉദ്യോഗസ്ഥർക്ക് മുന്നിൽ ഹാജരായി നടപടികൾ പൂർത്തിയാക്കാൻ അനുമതി നൽകി കർണാടക ചീഫ് ഇലക്ടറൽ ഓഫീസർ.
SIR പരിശോധനയുടെ ഭാഗമായി നോട്ടീസ് ലഭിച്ച ഇത്തരം വോട്ടർമാർക്ക് ഇനി നിർബന്ധമായും നേരിട്ട് ഇലക്ടറൽ രജിസ്ട്രേഷൻ ഓഫീസർ (ERO) അല്ലെങ്കിൽ അസിസ്റ്റന്റ് ഇലക്ടറൽ രജിസ്ട്രേഷൻ ഓഫീസർ (AERO) മുമ്പാകെ എത്തേണ്ടതില്ല. അവരുടെ പ്രായപൂർത്തിയായ കുടുംബാംഗത്തിന് ആവശ്യമായ രേഖകളും വിവരങ്ങളും സഹിതം ഹാജരായി വോട്ടറുടെ പേരുമായി ബന്ധപ്പെട്ട നടപടികൾ പൂർത്തിയാക്കാം.
സെപ്റ്റംബർ 11ന് പുറത്തിറക്കിയ നിർദേശത്തിൻ്റെ അടിസ്ഥാനത്തിൽ സംസ്ഥാനത്തെ എല്ലാ 224 നിയമസഭാ മണ്ഡലങ്ങളിലെയും ബന്ധപ്പെട്ട EROമാർക്കും AEROമാർക്കും നടപടി സംബന്ധിച്ച നിർദേശങ്ങൾ കൈമാറിയിട്ടുണ്ട്. ബെംഗളൂരു നഗരത്തിലെ ജില്ലാ തിരഞ്ഞെടുപ്പ് ഉദ്യോഗസ്ഥർക്കും Greater Bengaluru Authority (GBA) അധികൃതർക്കും നിർദേശം നൽകിയിട്ടുണ്ട്.
നോട്ടീസ് ലഭിച്ച മുതിർന്നവരും കിടപ്പുരോഗികളും നേരിട്ട് ഹിയറിങ് കേന്ദ്രങ്ങളിലെത്തുന്നത് ബുദ്ധിമുട്ടാണെന്ന പരാതികൾ ഉയർന്ന സാഹചര്യത്തിലാണ് തീരുമാനം. ബെംഗളൂരുവിൽ SIR നടപടിയുടെ ഭാഗമായി ഇതിനകം തന്നെ 24.06 ലക്ഷം നോട്ടീസുകൾ ജനറേറ്റ് ചെയ്തിട്ടുണ്ട്. ഇതിൽ 6.24 ലക്ഷം വോട്ടർമാരുടെ വിവരങ്ങളിൽ വിവിധ പൊരുത്തക്കേടുകളും 17.81 ലക്ഷം പേർക്ക് ‘നോ മാപ്പിങ്’ സംബന്ധമായ നോട്ടീസുകളുമാണ് നൽകിയിരിക്കുന്നത്.
അതേസമയം, കുടുംബാംഗത്തിന് പകരം ഹാജരാകുമ്പോൾ ബന്ധപ്പെട്ട വോട്ടറുടെ SIR നോട്ടീസുമായി ബന്ധപ്പെട്ട ആവശ്യമായ രേഖകളും വിവരങ്ങളും സമർപ്പിക്കേണ്ടതുണ്ട്. നടപടിക്രമത്തെക്കുറിച്ച് EROമാരും AEROമാരും രാഷ്ട്രീയ പാർട്ടി പ്രതിനിധികളുമായി നടത്തുന്ന പ്രതിവാര യോഗങ്ങളിൽ വിശദീകരണം നൽകണമെന്നും നിർദേശിച്ചിട്ടുണ്ട്.
SIR നടപടികളിൽ മുതിർന്നവരും രോഗികളും നേരിട്ട് ഹാജരാകേണ്ട സാഹചര്യം ഒഴിവാക്കുന്നത് പ്രത്യേകിച്ച് ബെംഗളൂരുവിലെ പ്രായമായ വോട്ടർമാർക്ക് ഏറെ ആശ്വാസകരമാകും. കഴിഞ്ഞ ദിവസങ്ങളിൽ ഹിയറിങ് കേന്ദ്രങ്ങളിൽ മുതിർന്നവർ ദീർഘനേരം കാത്തുനിൽക്കേണ്ടിവന്ന സംഭവങ്ങളും റിപ്പോർട്ട് ചെയ്തിരുന്നു
