നേപ്പാളിലെ പ്രളയദുരന്തത്തിൽ ദുരിതാശ്വാസ പ്രവർത്തനങ്ങൾക്കായി ഇന്ത്യയുടെ സഹായം തുടരുന്നു. 11 ടൺ അവശ്യസാധനങ്ങളുമായി ഇന്ത്യൻ വ്യോമസേനയുടെ നാലാമത്തെ വിമാനം നേപ്പാളിലേക്ക് പുറപ്പെട്ടതായി കേന്ദ്ര വിദേശകാര്യ മന്ത്രി ഡോ. എസ്. ജയശങ്കർ അറിയിച്ചു.
രക്ഷാപ്രവർത്തനത്തിനും തെരച്ചിലിനും ആവശ്യമായ ഉപകരണങ്ങൾ, ഡിഎൻഎ പരിശോധനയ്ക്കുള്ള സംവിധാനങ്ങൾ, കമ്പിളികൾ, സ്ലീപ്പിങ് ബാഗുകൾ, പ്ലാസ്റ്റിക് ഷീറ്റുകൾ, ശുചിത്വ കിറ്റുകൾ തുടങ്ങിയവയാണ് വിമാനത്തിൽ എത്തിക്കുന്നത്. ഫൊറൻസിക് വിദഗ്ധരും സംഘത്തോടൊപ്പം നേപ്പാളിലേക്ക് യാത്ര തിരിച്ചിട്ടുണ്ട്.
ഇതിനുപുറമേ സ്റ്റീൽ പാലം നിർമിക്കുന്നതിനുള്ള സാമഗ്രികളുമായി 16 ലോറികൾ റോഡ് മാർഗം നേപ്പാളിൽ എത്തിയിട്ടുണ്ട്. ദുരന്തബാധിത മേഖലകളിൽ ഗതാഗതം പുനഃസ്ഥാപിക്കുന്നതിനായി ആവശ്യമായ ബെയ്ലി പാലം നിർമാണ സാമഗ്രികളും ഉടൻ എത്തിക്കുമെന്ന് ജയശങ്കർ അറിയിച്ചു.
നേപ്പാളിൽ ഉണ്ടായ മിന്നൽപ്രളയത്തിൽ ഇതുവരെ 675 പേർ മരിച്ചതായും 2,400ലേറെ പേരെ കാണാതായതായും റിപ്പോർട്ടുകളുണ്ട്. ദുരന്തബാധിത മേഖലകളിൽ നാലാം ദിവസവും രക്ഷാപ്രവർത്തനങ്ങളും തെരച്ചിലും തുടരുകയാണ്. ദുരന്തത്തിൽ കുടുങ്ങിയവരെ കണ്ടെത്തുന്നതിനും അടിസ്ഥാന സൗകര്യങ്ങൾ പുനഃസ്ഥാപിക്കുന്നതിനും നേപ്പാൾ സർക്കാരിന് ആവശ്യമായ സഹായം നൽകുന്നത് തുടരുമെന്ന് ഇന്ത്യ വ്യക്തമാക്കി.
