എല്ലാ സംസ്ഥാന സർക്കാർ നിയമ ഓഫിസർമാരിൽ കുറഞ്ഞത് 30 ശതമാനം എങ്കിലും സ്ത്രീകൾ ആയിരിക്കണമെന്ന് സുപ്രിം കോടതി ജഡ്ജി ജസ്റ്റിസ് ബി വി നാഗരത്ന. പൊതു മേഖലയിലെ നിയമ ഉപദേഷ്ടാക്കളുടെ എംപാനൽമെൻ്റിലും എല്ലാ സംസ്ഥാന സർക്കാരിൻ്റെ സ്ഥാപനങ്ങളിലും ഏജൻസികളിലും കുറഞ്ഞത് 30 ശതമാനം എങ്കിലും സ്ത്രീകളായിരിക്കണമെന്ന് അവർ പറഞ്ഞു. ‘ബ്രേക്കിങ് ദി ഗ്ലാസ് സിലിങ്: വുമൺ ഹൂ മേഡ് ഇറ്റ്’ എന്ന വിഷയത്തിൽ നടന്ന സെമിനാറിൽ പങ്കെടുത്ത് സംസാരിക്കവെയാണ് ഈ പരാമർശം.
പഞ്ചായത്ത് തലങ്ങളിലെ വനിതാ സംവരണം 1.4 ദശലക്ഷം തിരഞ്ഞെടുക്കപ്പെട്ട വനിതാ പ്രതിനിധികളിലേക്ക് കടന്നതായി ജസ്റ്റിസ് നാഗരത്ന അഭിപ്രായപ്പെട്ടു. പെൺകുട്ടികൾക്ക് വിദ്യാഭ്യാസം നൽകേണ്ടതിൻ്റെ പ്രാധാന്യം ചൂണ്ടിക്കാണിച്ച അവർ പെൺകുട്ടികൾ വിദ്യാഭ്യാസം നേടുമ്പോൾ, വലിയ സ്വപ്നങ്ങൾ കാണാനും, അവരുടെ അഭിനിവേശങ്ങൾ പിന്തുടരാനും, അവരുടെ പൂർണ്ണ ശേഷി കൈവരിക്കാനും അവർക്ക് ശാക്തീകരണം ലഭിക്കുന്നു എന്നും അഭിപ്രായപ്പെട്ടു. സാമൂഹിക സാമ്പത്തിക നിലയോ പശ്ചാത്തലമോ പരിഗണിക്കാതെ ഓരോ പെൺകുട്ടിക്കും ഗുണനിലവാരമുള്ള വിദ്യാഭ്യാസം ലഭ്യമാകുന്നുണ്ടെന്ന് നാം ഉറപ്പാക്കണമെന്നും അവർ വ്യക്തമാക്കി.
