കനത്ത മഴയെ തുടർന്ന് യെദകൂമെരിയും ശ്രീവാഗിലു റെയിൽവേ സ്റ്റേഷനുകളും തമ്മിലുള്ള പാതയിൽ വൻ മണ്ണിടിച്ചിലുണ്ടായതോടെ മംഗളൂരു–ബെംഗളൂരു റൂട്ടിലെ ട്രെയിൻ ഗതാഗതം പൂർണമായും സ്തംഭിച്ചു. ശനിയാഴ്ച രാത്രിയോടെയാണ് പാളത്തിലേക്ക് മണ്ണും കല്ലും ഇടിഞ്ഞുവീണത്.
സംഭവത്തെ തുടർന്ന് മംഗളൂരു–യശ്വന്ത്പൂർ എക്സ്പ്രസ് (16540), യശ്വന്ത്പൂർ–മംഗളൂരു ജംഗ്ഷൻ എക്സ്പ്രസ് (16575) ഉൾപ്പെടെയുള്ള സർവീസുകൾ റദ്ദാക്കി. ബെംഗളൂരുവിൽ നിന്ന് പുറപ്പെട്ട മുരുഡേശ്വർ എക്സ്പ്രസ്, കോഴിക്കോട് എക്സ്പ്രസ് എന്നിവ ഹസനിൽ സർവീസ് അവസാനിപ്പിച്ചപ്പോൾ, മറ്റ് ചില ട്രെയിനുകളും വിവിധ സ്റ്റേഷനുകളിൽ യാത്ര അവസാനിപ്പിക്കുകയോ ഭാഗികമായി സർവീസ് നടത്തുകയോ ചെയ്തു.
മണ്ണിടിച്ചിൽ നടന്ന ഉടൻ തന്നെ പ്രത്യേക എൻജിനീയറിങ് സംഘവും റിലീഫ് ട്രെയിനും സ്ഥലത്തെത്തിച്ച് പാളം പുനഃസ്ഥാപിക്കുന്ന പ്രവർത്തനങ്ങൾ ആരംഭിച്ചു. എന്നാൽ തുടർച്ചയായ മഴയും വീണ്ടും മണ്ണിടിയാനുള്ള സാധ്യതയും രക്ഷാപ്രവർത്തനത്തിന് വെല്ലുവിളിയാകുന്നുണ്ട്. അധിക യന്ത്രസാമഗ്രികളും തൊഴിലാളികളെയും വിന്യസിച്ച് റെയിൽ ഗതാഗതം എത്രയും വേഗം പുനഃസ്ഥാപിക്കാൻ ദക്ഷിണ പശ്ചിമ റെയിൽവേ ശ്രമം തുടരുകയാണ്.
