വനിതാ ടി20 ലോകകപ്പിൽ സെമിഫൈനൽ സാധ്യതകൾ സജീവമാക്കാൻ ഇന്ത്യ ഇന്ന് നിർണായക മത്സരത്തിനിറങ്ങുന്നു. അയൽക്കാരായ ബംഗ്ലാദേശാണ് എതിരാളികൾ. ടൂർണമെന്റിൽ മുന്നോട്ടുപോകാൻ ഇരു ടീമുകൾക്കും വിജയം അനിവാര്യമായതിനാൽ പോരാട്ടം ആവേശകരമാകുമെന്നാണ് പ്രതീക്ഷ.
മാഞ്ചസ്റ്ററിലെ ഓൾഡ് ട്രാഫോർഡിൽ വൈകിട്ട് ഏഴ് മണിക്കാണ് മത്സരം. കഴിഞ്ഞ മത്സരത്തിൽ ദക്ഷിണാഫ്രിക്കയോട് ഏറ്റ തോൽവിയുടെ നിരാശ മറികടന്ന് വിജയവഴിയിലേക്ക് തിരിച്ചെത്താനാണ് ഇന്ത്യൻ ടീമിൻ്റെ ലക്ഷ്യം.
പാകിസ്ഥാനെതിരായ ശ്രദ്ധേയ വിജയത്തിൻ്റെ ആത്മവിശ്വാസത്തിലാണ് ബംഗ്ലാദേശ് കളത്തിലിറങ്ങുന്നത്. ഇന്ത്യയെ അട്ടിമറിച്ച് സെമി പ്രതീക്ഷകൾ ശക്തമാക്കാനാണ് അവരുടെ ശ്രമം.
എന്നാൽ പരസ്പര മത്സരങ്ങളുടെ കണക്കുകൾ ഇന്ത്യയ്ക്ക് വ്യക്തമായ മുൻതൂക്കം നൽകുന്നു. ഇതുവരെ നടന്ന 23 ടി20 ഏറ്റുമുട്ടലുകളിൽ 20 തവണയും ഇന്ത്യ വിജയിച്ചപ്പോൾ, ബംഗ്ലാദേശിന് മൂന്ന് വിജയങ്ങൾ മാത്രമാണ് നേടാനായത്. കൂടാതെ അവസാന ഏഴ് മത്സരങ്ങളിലും ഇന്ത്യ തന്നെയാണ് ജയം സ്വന്തമാക്കിയത്.
