ആരോഗ്യവകുപ്പ് ഡയറക്ടർ സ്ഥാനവുമായി ബന്ധപ്പെട്ട വിവാദത്തിൽ ഹൈക്കോടതി ഇന്ന് നിർണായക വിധി പറയും. ഡയറക്ടർ സ്ഥാനത്ത് നിന്ന് മാറ്റിയ ഡോ. കെ.ജെ. റീനയ്ക്ക് അനുകൂലമായി അഡ്മിനിസ്ട്രേറ്റീവ് ട്രൈബ്യൂണൽ നൽകിയ ഉത്തരവിനെതിരെ സംസ്ഥാന സർക്കാർ സമർപ്പിച്ച അപ്പീലിലാണ് ജസ്റ്റിസ് അനിൽ കെ. നരേന്ദ്രൻ അധ്യക്ഷനായ ബെഞ്ച് വിധി പ്രസ്താവിക്കുന്നത്.
വാദത്തിനിടെ ഡോ. റീനയുടെ നിയമനകാലാവധി ഇതിനകം അവസാനിച്ചുവെന്ന് അഡ്വക്കേറ്റ് ജനറൽ കോടതിയെ അറിയിച്ചു. അതേസമയം, ട്രൈബ്യൂണലിന്റെ ഉത്തരവ് ഇടക്കാല സ്വഭാവമുള്ളതാണെന്ന നിരീക്ഷണവും കോടതി രേഖപ്പെടുത്തി.
സംസ്ഥാന സർക്കാരിന്റെ ഉത്തരവിലൂടെ ഡോ. റീനയെ ആരോഗ്യവകുപ്പ് ഡയറക്ടർ സ്ഥാനത്ത് നിന്ന് മാറ്റി, അഡീഷണൽ ഡയറക്ടർ (ഫാമിലി വെൽഫെയർ) ഡോ. വി. മീനാക്ഷിക്ക് ചുമതല കൈമാറിയിരുന്നു. തുടർന്ന് ഡോ. റീനയെ എറണാകുളം പബ്ലിക് ഹെൽത്ത് ലബോറട്ടറിയുടെ ഡയറക്ടറായി നിയമിക്കുകയും ചെയ്തു.
ഈ നടപടി ചോദ്യം ചെയ്ത് ഡോ. റീന അഡ്മിനിസ്ട്രേറ്റീവ് ട്രൈബ്യൂണലിനെ സമീപിച്ചു. പകർച്ചവ്യാധി വ്യാപനത്തിനിടയിൽ അവധിക്ക് അപേക്ഷിച്ചതടക്കമുള്ള കാരണങ്ങളാണ് സ്ഥലംമാറ്റത്തിന് അടിസ്ഥാനമാക്കിയതെന്ന് സർക്കാർ വ്യക്തമാക്കിയിരുന്നു. എന്നാൽ, നിയമാനുസൃത നടപടിക്രമങ്ങൾ പാലിക്കാതെയാണ് തന്നെ മാറ്റിയതെന്നും അവധിക്ക് അപേക്ഷിച്ചിട്ടില്ലെന്നും ഡോ. റീന ട്രൈബ്യൂണലിനെ അറിയിച്ചു.
ഇത് പരിഗണിച്ച ട്രൈബ്യൂണൽ സ്ഥലംമാറ്റ ഉത്തരവ് സ്റ്റേ ചെയ്തിരുന്നു. ട്രൈബ്യൂണലിന്റെ ഈ ഉത്തരവിനെതിരെയാണ് ആരോഗ്യവകുപ്പ് ഹൈക്കോടതിയെ സമീപിച്ചത്. ഇന്ന് പുറപ്പെടുന്ന വിധി കേസിന്റെ തുടർനടപടികളിൽ നിർണായകമാകും.
