കാവേരി നദിക്ക് കുറുകെ കർണാടക സർക്കാർ മുന്നോട്ടുവയ്ക്കുന്ന മേക്കേദാട്ടു അണക്കെട്ട് പദ്ധതിക്കെതിരെ തമിഴ്‌നാട് നിയമസഭയിൽ ഏകകണ്ഠമായി പ്രമേയം പാസാക്കി. മുഖ്യമന്ത്രി വിജയ് അവതരിപ്പിച്ച പ്രമേയത്തിൽ, ഏകദേശം 9,000 കോടി രൂപ ചെലവിൽ നടപ്പാക്കാൻ ഉദ്ദേശിക്കുന്ന പദ്ധതി തമിഴ്‌നാട്ടിലെ കർഷകരുടെയും സംസ്ഥാനത്തിൻ്റെ ജലാവകാശങ്ങളുടെയും താൽപര്യങ്ങൾക്ക് വിരുദ്ധമാണെന്ന് ചൂണ്ടിക്കാട്ടി.
കേന്ദ്ര സർക്കാരിൻ്റെ മുൻകൂർ അനുമതിയും ആവശ്യമായ പാരിസ്ഥിതിക-സാങ്കേതിക അനുമതികളും ലഭിക്കാതെ പദ്ധതി മുന്നോട്ടുകൊണ്ടുപോകാനുള്ള കർണാടകയുടെ ശ്രമം അംഗീകരിക്കാനാകില്ലെന്ന് പ്രമേയത്തിൽ വ്യക്തമാക്കി. മേക്കേദാട്ടു പദ്ധതിക്ക് പരിസ്ഥിതി, സാങ്കേതിക അനുമതികൾ നൽകാതിരിക്കണമെന്ന് തമിഴ്‌നാട് കേന്ദ്രത്തോട് ആവശ്യപ്പെട്ടു.
തമിഴ്‌നാട്ടിന്റെ ജലവിഭവ അവകാശങ്ങൾ സംരക്ഷിക്കുന്നത് എല്ലാ രാഷ്ട്രീയ കക്ഷികളുടെയും പൊതുബാധ്യതയാണെന്ന് പ്രമേയം അവതരിപ്പിച്ചുകൊണ്ട് മുഖ്യമന്ത്രി വിജയ് പറഞ്ഞു. പ്രമേയത്തിന് കോൺഗ്രസ് അംഗങ്ങളും പിന്തുണ പ്രഖ്യാപിച്ചതോടെ നിയമസഭ അത് ഏകകണ്ഠമായി അംഗീകരിച്ചു.
കാവേരി ജലവിതരണവുമായി ബന്ധപ്പെട്ട് കാവേരി തർക്ക പരിഹാര ട്രൈബ്യൂണലും സുപ്രീം കോടതിയും പുറപ്പെടുവിച്ച വിധികളെ അവഗണിച്ചുകൊണ്ടാണ് കർണാടക സർക്കാർ മേക്കേദാട്ടു പദ്ധതിയുമായി മുന്നോട്ട് പോകുന്നതെന്ന് പ്രമേയത്തിൽ വിമർശിച്ചു. സംസ്ഥാനങ്ങൾ തമ്മിലുള്ള ജലവിഭവ തർക്കം കൂടുതൽ സങ്കീർണമാക്കാൻ ഇടയാക്കുന്നതാണ് കർണാടകയുടെ നിലപാടെന്നും തമിഴ്‌നാട് നിയമസഭ അഭിപ്രായപ്പെട്ടു.
