മാസപ്പടി കേസുമായി ബന്ധപ്പെട്ട എൻഫോഴ്‌സ്‌മെന്റ് ഡയറക്ടറേറ്റിന്റെ (ഇഡി) അന്വേഷണം നിർണായക ഘട്ടത്തിലേക്ക് കടക്കുന്നു. കേസിൻ്റെ ഭാഗമായി സിഎംആർഎൽ മാനേജിങ് ഡയറക്ടർ ശശിധരൻ കർത്തയുടെ മകൻ ശരൺ എസ്. കർത്തയെ ഇന്ന് ഇഡി ചോദ്യം ചെയ്യും. സിഎംആർഎല്ലും എക്സാലോജിക്കും തമ്മിൽ നടന്ന സാമ്പത്തിക ഇടപാടുകളെക്കുറിച്ചുള്ള വിശദാംശങ്ങളാണ് അന്വേഷണസംഘം തേടുന്നത്.
അതേസമയം, കേസിൽ ആരോപണവിധേയയായ മുഖ്യമന്ത്രിയുടെ മകൾ വീണ തൈക്കണ്ടിയോട് ബുധനാഴ്ച ഹാജരാകാൻ ഇഡി നിർദേശം നൽകിയിട്ടുണ്ട്. അഭിഭാഷകർ മുഖേന രേഖകൾ സമർപ്പിക്കാമെന്ന ആവശ്യത്തെ ഇഡി നേരത്തെ നിരസിച്ചിരുന്നു. ആരോഗ്യപ്രശ്നങ്ങൾ ചൂണ്ടിക്കാട്ടി വീണ നൽകിയ അപേക്ഷ പരിഗണിച്ചാണ് ചോദ്യം ചെയ്യൽ അഞ്ച് ദിവസം മാറ്റിവെച്ചത്. സിഎംആർഎല്ലിൽ നിന്ന് ലഭിച്ച പണത്തിൻ്റെ ഉറവിടം വ്യക്തമാക്കുന്ന രേഖകളുമായി ഹാജരാകണമെന്നാണ് നിർദേശം.
സിഎംആർഎല്ലുമായി ബന്ധപ്പെട്ട് 132 കോടിയിലധികം രൂപയുടെ ക്രമക്കേട് സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് (SFIO) കണ്ടെത്തിയിരുന്നു. ഇതുമായി ബന്ധപ്പെട്ട കള്ളപ്പണ ഇടപാടുകളാണ് ഇഡി അന്വേഷിക്കുന്നത്. 2016 മുതൽ 2021 വരെ സിഎംആർഎല്ലിൽ നിന്ന് വീണയ്ക്ക് 2.78 കോടി രൂപ ലഭിച്ചതായും എംപവർ ഇന്ത്യ ക്യാപിറ്റലിൽ നിന്ന് 50 ലക്ഷം രൂപ വായ്പയായി ലഭിച്ചതായും അന്വേഷണ രേഖകളിൽ പറയുന്നു.
നേരത്തെ നടത്തിയ പരിശോധനകളിൽ വീണയുടേത് ഉൾപ്പെടെയുള്ള വിവിധ ബാങ്ക് അക്കൗണ്ടുകളിലായി 18 കോടിയിലധികം രൂപ ഇഡി മരവിപ്പിച്ചിരുന്നു. കൂടാതെ, മുൻപ് നൽകിയ മൊഴികളും നിലവിൽ ലഭ്യമായ തെളിവുകളും തമ്മിൽ ചില പൊരുത്തക്കേടുകൾ ഉണ്ടെന്നാണ് അന്വേഷണ വൃത്തങ്ങൾ സൂചിപ്പിക്കുന്നത്.
എക്സാലോജിക്കും കരിമണൽ കമ്പനിയും തമ്മിലുള്ള സാമ്പത്തിക ഇടപാടുകളുടെ മുഴുവൻ രേഖകളും ഹാജരാക്കാൻ കോടതി നിർദേശിച്ചിരുന്നു. ഈ രേഖകൾ കൂടി പരിശോധിച്ച ശേഷമായിരിക്കും തുടർ ചോദ്യം ചെയ്യലുകളും അന്വേഷണ നടപടികളും മുന്നോട്ടുപോകുക.
