നടനനും തമിഴക വെട്രി കഴകം അധ്യക്ഷനുമായ വിജയിയെ സിബിഐ വീണ്ടും ചോദ്യം ചെയ്യലിന് വിളിപ്പിച്ചു. കരൂരിൽ തിരഞ്ഞെടുപ്പ് പ്രചാരണത്തിനിടെയുണ്ടായ തിക്കിലും തിരക്കിലും പെട്ട് നിരവധിയാളുകൾ മരിച്ച സംഭവത്തിൻ്റെ അന്വേഷണത്തിന്‍റെ ഭാഗമായാണ് നടപടി. ചെന്നൈയിലെ സിബിഐ ഓഫീസിൽ ചൊവ്വാഴ്ച ഹാജരാകാനാണ് നിർദ്ദേശം നൽകിയിരിക്കുന്നത്.
സംഭവത്തിൽ സംഘാടകരുടെ ഭാഗത്തുനിന്ന് വീഴ്ചകൾ സംഭവിച്ചോ എന്നും സുരക്ഷാ വീഴ്ചയുണ്ടായോ എന്നുമാണ് സിബിഐ അന്വേഷിക്കുന്നത്. ഇത് രണ്ടാം തവണയാണ് വിജയിയെ സിബിഐ ചോദ്യം ചെയ്യലിനായി വിളിക്കുന്നത്. നേരത്തെ നൽകിയ മൊഴികളിലെ വ്യക്തത കുറവാണ് വീണ്ടും സമൻസ് അയക്കാൻ കാരണമെന്നാണ് റിപ്പോർട്ട്.
