കർണാടകയിലെ ലക്കുണ്ടി ഗ്രാമത്തിൽ വീടുനിർമാണത്തിനിടെ നിധി കണ്ടെത്തി. വീടിന്‍റെ അടിത്തറയുടെ നിർമാണത്തിനായി തൊഴിലാളികൾ കുഴിക്കുന്നതിനിടെ സ്വർണാഭരണങ്ങളുടെ ശേഖരം കണ്ടെത്തുകയായിരുന്നു. ആഭരണങ്ങൾ സർക്കാർ ട്രഷറിയിലേക്ക് മാറ്റി.
ഗഡഗ് ജില്ലയിലെ ലക്കുണ്ടി ഗ്രാമത്തിലാണ് സംഭവം. സ്വർണാഭരണങ്ങൾ അടങ്ങിയ പുരാതന ചെമ്പ് പാത്രവും അതിനകത്ത് മാലകൾ, വളകൾ, മോതിരങ്ങൾ എന്നിവയടങ്ങിയ ശേഖരവും ഉണ്ടായിരുന്നു. സ്വർണ്ണം ഏകദേശം ഒരു കിലോഗ്രാം ഭാരമുണ്ടായിരുന്നു.
സന്ദർശിച്ച എഎസ്‌ഐയിലെ സീനിയർ ആർക്കിയോളജിസ്റ്റായ രമേശ് മുലിമാനി, ആഭരണങ്ങൾ നൂറ്റാണ്ടുകൾക്ക് മുമ്പ് കുഴിച്ചിട്ട ഒരു നിധിയായിരിക്കാൻ സാധ്യതയില്ലെന്ന് പറഞ്ഞു. “കണ്ടെത്തിയ പല ആഭരണങ്ങളും തകർന്ന നിലയിലാണ്. അവ വീടിൻ്റെ അടുക്കളയിൽ നിന്നാണ് കണ്ടെത്തിയത്. മുൻകാലങ്ങളിൽ, മുതിർന്നവർ അടുക്കളയ്ക്ക് സമീപം കുഴിച്ചിട്ട് ആഭരണങ്ങൾ ഒളിപ്പിക്കാറുണ്ടായിരുന്നു,” കണ്ടെടുത്ത ആഭരണങ്ങൾ വീട്ടിൽ താമസിക്കുന്ന കുടുംബത്തിലെ പൂർവ്വികർ കുഴിച്ചിട്ടിരിക്കാമെന്ന് സംശയിക്കുന്നതായി അദ്ദേഹം പറഞ്ഞു.
