ഡയറക്ടറേറ്റ് ഓഫ് റവന്യൂ ഇന്‍റലിജൻസ് (ഡിആർഐ) നടത്തിയ പരിശോധനയിൽ 40 കോടിയുടെ സ്വർണവുമായി അന്താരാഷ്ട്ര സ്വർണ കള്ളക്കടത്ത് സംഘം അറസ്റ്റിലായി. അഗർത്തലയിലും ഡൽഹിയിലുമായി നടത്തിയ റെയ്ഡുകളിൽ ദുബായ്, ബംഗ്ലാദേശ് എന്നിവിടങ്ങളിൽ പ്രവർത്തിക്കുന്ന സംഘത്തിൽനിന്ന് 29 കിലോയിലധികം വിദേശ സ്വർണവും ഏകദേശം 2.90 കോടിയുടെ പണവും പിടിച്ചെടുത്തു.
രഹസ്യ വിവരത്തിന്‍റെ അടിസ്ഥാനത്തിൽ ത്രിപുരയിലെ അഗർത്തലയിൽനിന്ന് രണ്ട് കൺസൈൻമെന്‍റുകൾ ഡെലിവറി ചെയ്യുന്നതിനിടെ പ്രധാന സിൻഡിക്കേറ്റ് അംഗത്തെ ആഭ്യന്തര ലോജിസ്റ്റിക്സ് വെയർഹൗസിൽനിന്ന് പിടികൂടി. ചരക്കുകൾ പരിശോധിച്ചതിൽനിന്ന് അന്താരാഷ്ട്ര റിഫൈനറി അടയാളങ്ങളുള്ള 15 കിലോ വിദേശ ഉത്ഭവ സ്വർണം കണ്ടെടുത്തു, ഇതിന്‍റെ മൂല്യം ഏകദേശം 20.73 കോടി വരും. കസ്റ്റംസ് നിയമത്തിലെ വ്യവസ്ഥകൾ പ്രകാരം ഏകദേശം 40 കോടി വിലമതിക്കുന്ന 29.2 കിലോഗ്രാം സ്വർണവും 2.9 കോടി പണവും പിടിച്ചെടുത്തു. സംഘത്തിലെ നാല് അംഗങ്ങളെ അറസ്റ്റ് ചെയ്തു.
