ഇറാനും യുഎസും തമ്മിലുള്ള സംഘർഷം വർദ്ധിക്കുന്ന സാഹചര്യത്തിൽ ഇറാനിലുള്ള യുഎസ് പൗരന്മാർ ഉടൻ രാജ്യം വിടണമെന്ന് യുഎസ് മുന്നറിയിപ്പ് നൽകി. യുഎസ് സർക്കാരിന്‍റെ സഹായത്തെ ആശ്രയിക്കാതെ ഇറാനിൽ നിന്നു പുറത്തു കടക്കാൻ ഒരു പദ്ധതി തയാറാക്കണമെന്നാണ് ഇറാനിലെ യുഎസ് വെർച്വൽ എംബസിയുടെ മുന്നറിയിപ്പ്. ഇന്‍റർനെറ്റ് സേവനങ്ങൾ തടസപ്പെടാൻ സാധ്യതയുള്ളതിനാൽ ആശയവിനിമയത്തിനു ബദൽ മാർഗങ്ങൾ കണ്ടെത്തണമെന്നും മുന്നറിയിപ്പിൽ പറയുന്നു. സുരക്ഷിതമാണെങ്കിൽ തുർക്കിയിലേക്കോ അർമേനിയയിലേക്കോ കരമാർഗം യാത്ര ചെയ്യുന്ന കാര്യം പരിഗണിക്കണമെന്നും അറിയിപ്പിലുണ്ട്.
ചുറ്റുപാടുകളെക്കുറിച്ച് ജാഗ്രത പാലിക്കണമെന്നും പുറത്തുപോകാൻ കഴിയുന്നില്ലെങ്കിൽ താമസസ്ഥലത്തോ മറ്റൊരു സുരക്ഷിതമായ കെട്ടിടത്തിനുള്ളിലോ കഴിയുക. ഭക്ഷണം, വെള്ളം, മരുന്നുകൾ, മറ്റ് അത്യാവശ്യ സാധനങ്ങൾ എന്നിവ കരുതണമെന്നും നിർദേശത്തിൽ പറയുന്നു. വിമാന സർവീസുകൾ മുന്നറിയിപ്പില്ലാതെ റദ്ദാക്കാനോ തടസപ്പെടാനോ സാധ്യതയുണ്ടെന്നും വിവരങ്ങൾക്കായി എയർലൈനുകളുമായി നേരിട്ട് ബന്ധപ്പെടണമെന്നും മുന്നറിയിപ്പിലുണ്ട്.
