കർണാടകയുടെ ആഡംബര വിനോദസഞ്ചാര ട്രെയിനായ ഗോൾഡൻ ചാരിയറ്റിൻ്റെ 2026–27 സീസണിന് തുടക്കമായി. ശനിയാഴ്ച ബെംഗളൂരുവിലെ ക്രാന്തിവീര സംഗൊള്ളി റായണ്ണ റെയിൽവേ സ്റ്റേഷനിൽനിന്ന് മുഖ്യമന്ത്രി ഡി.കെ. ശിവകുമാർ ട്രെയിൻ ഫ്ലാഗ് ഓഫ് ചെയ്തു. പുതിയ സീസണിലെ ആദ്യ യാത്രയായ അഞ്ചു രാത്രിയും ആറു പകലും നീളുന്ന ‘പ്രൈഡ് ഓഫ് കർണാടക’ പൂർണമായും ബുക്ക് ചെയ്തിട്ടുണ്ട്. 75 യാത്രക്കാരാണ് ആദ്യ യാത്രയിലുള്ളത്. ഇവർക്കായി ഏകദേശം 60 ജീവനക്കാരും ട്രെയിനിലുണ്ടാകും.
ബന്ദിപ്പൂർ കടുവാ സങ്കേതം, മൈസൂരു, ബേലൂർ, ഹളേബീഡു, ചിക്കമഗളൂരു, ഹംപി, ഗോവ എന്നിവിടങ്ങളാണ് ആദ്യ യാത്രയുടെ പ്രധാന ആകർഷണങ്ങൾ. വന്യജീവി സങ്കേതങ്ങൾ, രാജകീയ പൈതൃകം, ഹൊയ്സാല വാസ്തുവിദ്യ, കാപ്പിത്തോട്ടങ്ങൾ, ചരിത്രസ്മാരകങ്ങൾ, തീരദേശ കാഴ്ചകൾ എന്നിവ ആസ്വദിക്കാൻ യാത്രക്കാർക്ക് അവസരമൊരുക്കുന്നതാണ് ഈ പാക്കേജ്.
യാത്രയ്ക്കുമുമ്പ് 2026 മേയ് മുതൽ ഓഗസ്റ്റ് വരെ മൈസൂരു വർക്ക്‌ഷോപ്പിൽ ട്രെയിനിന്റെ അറ്റകുറ്റപ്പണികളും നവീകരണവും നടത്തി. പുറംഭാഗം പുതുക്കിയതിനൊപ്പം ട്രെയിനിലെ അടുക്കള ആധുനികവത്കരിക്കുകയും ജലശുദ്ധീകരണ സംവിധാനത്തിൽ മെച്ചപ്പെടുത്തലുകൾ വരുത്തുകയും ചെയ്തു. അതിഥികൾക്കായി ആഡംബര താമസസൗകര്യങ്ങൾ, ഭക്ഷണശാലകൾ, സ്പാ തുടങ്ങിയ സൗകര്യങ്ങളും ട്രെയിനിലുണ്ട്.
2026–27 സീസണിൽ ആകെ 13 യാത്രകളാണ് ആസൂത്രണം ചെയ്തിരിക്കുന്നത്. ഇതിൽ ഏഴ് ‘പ്രൈഡ് ഓഫ് കർണാടക’, മൂന്ന് ‘ഗ്ലിംപ്സസ് ഓഫ് കർണാടക’, മൂന്ന് ‘ജുവൽസ് ഓഫ് സൗത്ത്’ യാത്രകളാണ്. കർണാടകയുടെ വിനോദസഞ്ചാര സാധ്യതകൾ ദേശീയ, അന്തർദേശീയ തലങ്ങളിൽ പ്രചരിപ്പിക്കുന്നതിനൊപ്പം പ്രാദേശിക തൊഴിൽ അവസരങ്ങൾ വർധിപ്പിക്കുകയുമാണ് പദ്ധതിയുടെ ലക്ഷ്യമെന്ന് മുഖ്യമന്ത്രി വ്യക്തമാക്കി.
