കർണാടകയിലെ ദാവൺഗെരെ, ഹാവേരി, ചിത്രദുർഗ്ഗ, വിജയനഗര ജില്ലകളിലൂടെ കടന്നുപോകുന്ന ദേശീയ-സംസ്ഥാന പാതകളിൽ വന്യജീവികൾ വാഹനാപകടങ്ങളിൽപ്പെട്ട് ചാകുന്നത് പതിവാകുന്നു. പുള്ളിപ്പുലികളും കരടികളും ഉൾപ്പെടെയുള്ള വന്യമൃഗങ്ങളാണ് അതിവേഗത്തിലെത്തുന്ന വാഹനങ്ങളിടിച്ച് കൊല്ലപ്പെടുന്നത്. കുന്നിൻപ്രദേശങ്ങളിലൂടെയും വനമേഖലകളിലൂടെയും കടന്നുപോകുന്ന പാതകളിൽ തുടർച്ചയായി അപകടങ്ങൾ റിപ്പോർട്ട് ചെയ്യപ്പെടുന്നത് ആശങ്കയുയർത്തുന്നു.
പകൽസമയത്തെ കനത്ത ഗതാഗതവും മനുഷ്യസാന്നിധ്യവും കാരണം വന്യമൃഗങ്ങൾ അർധരാത്രിക്കുശേഷമാണ് ഭക്ഷണവും വെള്ളവും തേടി ജനവാസമേഖലകളിലേക്കും വനത്തിൻ്റെ മറ്റു ഭാഗങ്ങളിലേക്കും സഞ്ചരിക്കുന്നത്. ഈ സമയങ്ങളിൽ റോഡ് മുറിച്ചുകടക്കുന്ന മൃഗങ്ങളെ അതിവേഗത്തിലെത്തുന്ന വാഹനങ്ങൾ ഇടിച്ചുതെറിപ്പിക്കുകയാണ്.
കഴിഞ്ഞ ഒക്ടോബർ 13-ന് രാത്രി ചിത്രദുർഗ്ഗ താലൂക്കിലെ തമതകല്ലുവിന് സമീപം തിരിച്ചറിയാത്ത വാഹനം ഇടിച്ച് ഒരു പുള്ളിപ്പുലി ചത്തിരുന്നു. കഴിഞ്ഞ രണ്ടു വർഷത്തിനിടെ ഇതേ പ്രദേശത്ത് ഒന്നിലധികം പുള്ളിപ്പുലികളും കരടികളും വാഹനാപകടങ്ങളിൽപ്പെട്ട് ചത്തിട്ടുണ്ടെന്നാണ് ഔദ്യോഗിക വിവരങ്ങൾ.
സെപ്റ്റംബർ 8-ന് ദാവൺഗെരെ താലൂക്കിലെ അണഗോഡിന് സമീപം ദേശീയപാത 48 മുറിച്ചുകടക്കുന്നതിനിടെ വാഹനമിടിച്ച് മറ്റൊരു പുള്ളിപ്പുലിക്ക് ഗുരുതരമായി പരിക്കേറ്റിരുന്നു. പിറ്റേന്ന് പുലിയെ രക്ഷപ്പെടുത്താനെത്തിയ വനംവകുപ്പ് ജീവനക്കാരെ അത് ആക്രമിക്കുകയും ചെയ്തു. തുടർന്ന് മയക്കുവെടിവെച്ച് പിടികൂടിയ പുലിയെ ആദ്യം ഹംപിയിലെ മൃഗശാലയിലേക്കും പിന്നീട് ബന്നാർഘട്ട ദേശീയോദ്യാനത്തിലേക്കും മാറ്റി.
വന്യമൃഗങ്ങളെ വാഹനമിടിച്ചാൽ നിയമനടപടി നേരിടേണ്ടിവരുമെന്ന ഭയത്തിൽ പല ഡ്രൈവർമാരും വനംവകുപ്പിനെയോ ഹൈവേ പട്രോളിങ് ഉദ്യോഗസ്ഥരെയോ വിവരമറിയിക്കാതെ സംഭവസ്ഥലത്തുനിന്ന് കടന്നുകളയുകയാണെന്ന് പ്രദേശവാസികൾ പറയുന്നു. ഇതോടെ അപകടങ്ങളുടെ യഥാർഥ കണക്കുകൾ ശേഖരിക്കുന്നതും വന്യമൃഗങ്ങൾക്ക് ആവശ്യമായ അടിയന്തര ചികിത്സ ലഭ്യമാക്കുന്നതും പ്രയാസകരമാകുന്നു.
പുള്ളിപ്പുലികൾക്കും കരടികൾക്കും പുറമെ മാനുകൾ, കാട്ടുപൂച്ചകൾ, കാട്ടുപന്നികൾ, മരപ്പട്ടികൾ തുടങ്ങിയ നിരവധി ജീവികളും വാഹനാപകടങ്ങളിൽ കൊല്ലപ്പെടുന്നുണ്ട്. ചില മൃഗങ്ങൾ വാഹനമിടിച്ചശേഷം കാട്ടിലേക്ക് ഓടിപ്പോകുകയും പിന്നീട് അവിടെവെച്ച് ചാകുകയും ചെയ്യുന്നു. ഇത്തരം സംഭവങ്ങളിൽ മരണകാരണം പലപ്പോഴും ഔദ്യോഗികമായി രേഖപ്പെടുത്തപ്പെടാതെ പോകുന്ന സാഹചര്യവുമുണ്ട്.
ദേശീയപാതകളിൽ വന്യജീവികൾ കൊല്ലപ്പെടുന്ന സംഭവങ്ങളിൽ സർക്കാർ ആശങ്ക രേഖപ്പെടുത്തിയിട്ടുണ്ട്. അപകടങ്ങൾ തടയാൻ അടിയന്തര നടപടികൾ സ്വീകരിക്കണമെന്ന് വനംവകുപ്പിന് നിർദേശവും നൽകിയിട്ടുണ്ട്.
വിഷയം ഗൗരവമായി പരിശോധിച്ച് ആവശ്യമായ തുടർനടപടികൾ സ്വീകരിക്കുമെന്ന് ദാവൺഗെരെ ഡെപ്യൂട്ടി കൺസർവേറ്റർ ഓഫ് ഫോറസ്റ്റ് (ഡിസിഎഫ്) പി.എൻ. ഹർഷവർധൻ അറിയിച്ചു. വനമേഖലകളിലൂടെ കടന്നുപോകുന്ന പാതകളിൽ വാഹനങ്ങളുടെ വേഗം നിയന്ത്രിക്കുന്നതിനും അപകടസാധ്യതയുള്ള സ്ഥലങ്ങളിൽ നിരീക്ഷണം ശക്തമാക്കുന്നതിനും നടപടികൾ ആവശ്യമാണ്.
വന്യജീവികളുടെ സഞ്ചാരപാതകൾ തിരിച്ചറിഞ്ഞ് മുന്നറിയിപ്പ് ബോർഡുകൾ സ്ഥാപിക്കുക, രാത്രികാലങ്ങളിൽ വേഗനിയന്ത്രണം കർശനമാക്കുക, അപകടത്തിൽപ്പെടുന്ന മൃഗങ്ങളെക്കുറിച്ച് ഉടൻ വിവരമറിയിക്കാനുള്ള സംവിധാനം ഉറപ്പാക്കുക തുടങ്ങിയ നടപടികൾ വന്യജീവികളുടെ ജീവൻ സംരക്ഷിക്കാൻ നിർണായകമാകും.
