കർണാടക ഡി.ജി-ഐ.ജി.പിയായി എം.എ. സലീമിനെ നിയമിച്ചു

കർണാടകയിലെ ഡി.ജി ഐ.ജി.പിയായി മുതിർന്ന ഐ.പി.എസ് ഉദ്യോഗസ്ഥൻ എം.എ. സലീമിനെ നിയമിച്ചു. ഏപ്രിൽ 30 ന് മുൻ ഡി.ജി.പി അലോക് മോഹൻ വിരമിച്ചതിനെ തുടർന്നുള്ള ഒഴിവിലാണ് നിയമനം. അലോക് മോഹൻ്റെ സർവിസ് മേയ് 21 വരെ സർക്കാർ ദീർഘിപ്പിച്ചിരുന്നു. 2023 മേയ് 22 നായിരുന്നു അലോക് മോഹൻ ചാർജെടുത്തത്. ബംഗളൂരു ചിക്കബാണവര സ്വദേശിയായ സലീം 1993 ബാച്ച് കർണാടക കേഡർ ഐ.പി.എസുകാരനാണ്. സി.ഐ.ഡി വിഭാഗം ഡി.ജി.പിയായി സേവനമനുഷ്ഠിക്കവെയാണ് പുതിയ നിയമനം ലഭിച്ചത്. ഒരു വർഷംകൂടി സർവിസിൽ കാലാവധിയുള്ള എം.എ. സലീം 2026 ജൂണിൽ വിരമിക്കും. ബംഗളൂരു സിറ്റി സ്പെഷൽ പൊലീസ് കമ്മീഷണറായി മുമ്പ് പ്രവർത്തിച്ചിട്ടുണ്ട്.