നന്ദിനി പാലിൻ്റെ വില ലിറ്ററിന് എട്ട് രൂപ വർധിപ്പിച്ചതോടെ ബെംഗളൂരുവിലെ ഹോട്ടലുകളിലും റസ്റ്റോറന്റുകളിലും ഭക്ഷണവില ഉയർന്നേക്കും. പാൽ വില വർധനയുടെ അധിക ബാധ്യത ഉപഭോക്താക്കളിലേക്ക് കൈമാറേണ്ടിവരുമെന്ന് ബെംഗളൂരു ഹോട്ടൽസ് അസോസിയേഷൻ അറിയിച്ചു. ചായ, കാപ്പി, പ്രഭാതഭക്ഷണം തുടങ്ങി പാൽ ഉപയോഗിച്ച് തയ്യാറാക്കുന്ന ഭക്ഷണപാനീയങ്ങളുടെ വില വർധിക്കാൻ സാധ്യതയുണ്ട്.
ഒക്ടോബർ 29-ന് ചേർന്ന കർണാടക മന്ത്രിസഭാ യോഗത്തിലാണ് നന്ദിനി പാലിൻ്റെ വില ലിറ്ററിന് എട്ട് രൂപ വർധിപ്പിക്കാൻ തീരുമാനിച്ചത്. ഇതോടെ ടോൺഡ് പാലിൻ്റെ വില 46 രൂപയിൽ നിന്ന് 54 രൂപയായി ഉയർന്നു. പുതുക്കിയ നിരക്കുകൾ നവംബർ ഒന്നുമുതൽ പ്രാബല്യത്തിൽ വന്നു. വർധിപ്പിച്ച തുകയിൽ ഏഴ് രൂപ ക്ഷീരകർഷകർക്കും ഒരു രൂപ മിൽക്ക് യൂണിയനുകൾക്കുമാണ് ലഭിക്കുക.
പാലുത്പാദനത്തിനുള്ള കാലിത്തീറ്റ, മരുന്നുകൾ, ഗതാഗതം, പാക്കേജിങ് തുടങ്ങിയവയുടെ ചെലവ് വർധിച്ചതാണ് വില കൂട്ടാൻ കാരണമായി മിൽക്ക് യൂണിയനുകൾ ചൂണ്ടിക്കാട്ടുന്നത്.
പാൽ വിലയിൽ ലിറ്ററിന് രണ്ടോ മൂന്നോ രൂപയുടെ വർധന മാത്രമായിരുന്നെങ്കിൽ അധിക ചെലവ് ഹോട്ടലുകൾ തന്നെ വഹിക്കുമായിരുന്നു. എന്നാൽ എട്ട് രൂപയുടെ വർധനവ് വലിയ സാമ്പത്തിക ബാധ്യത സൃഷ്ടിക്കുന്നതിനാൽ മെനു നിരക്കുകൾ ഉയർത്തേണ്ട സാഹചര്യമാണുള്ളതെന്ന് ഹോട്ടൽസ് അസോസിയേഷൻ വാർത്താക്കുറിപ്പിൽ വ്യക്തമാക്കി. അതേസമയം, നവംബർ ഒന്നുമുതൽ എല്ലാ ഹോട്ടലുകളും ഒരേസമയം വില വർധിപ്പിക്കില്ലെന്നും അസോസിയേഷൻ അറിയിച്ചു. ഓരോ സ്ഥാപനവും പാലിൻ്റെ പ്രതിദിന ഉപഭോഗം, പ്രവർത്തനച്ചെലവ്, ലാഭവിഹിതം എന്നിവ വിലയിരുത്തിയ ശേഷമായിരിക്കും പുതിയ നിരക്കുകൾ നിശ്ചയിക്കുക.
പാലിന് പുറമെ മറ്റ് നിത്യോപയോഗ സാധനങ്ങളുടെയും പ്രവർത്തനച്ചെലവുകളുടെയും വില ഉയരുന്നത് ഹോട്ടൽ മേഖലയെ കൂടുതൽ സമ്മർദത്തിലാക്കുന്നുണ്ട്. ഇതോടെ വരും ആഴ്ചകളിൽ ബേക്കറികൾ, ദക്ഷിണേന്ത്യൻ ടിഫിൻ സെന്ററുകൾ, കഫേകൾ എന്നിവിടങ്ങളിലെ ഭക്ഷണവിലയിലും മാറ്റമുണ്ടായേക്കും. പാൽ വില വർധനയുടെ പ്രതിഫലനം വരും ദിവസങ്ങളിൽ ബെംഗളൂരുവിലെ സാധാരണക്കാരുടെ കുടുംബ ബജറ്റിലും ഹോട്ടൽ ഭക്ഷണച്ചെലവിലും പ്രതിഫലിക്കുമെന്നാണ് വിലയിരുത്തൽ.
