ആറു പതിറ്റാണ്ടിലേറെ ഇന്ത്യൻ ചലച്ചിത്രസംഗീതത്തെ സ്വരമാധുര്യത്താൽ സമ്പന്നമാക്കിയ എസ്. ജാനകിക്ക് മൈസൂരുവിൽ പൂർണ ഔദ്യോഗിക ബഹുമതികളോടെ അന്ത്യാഞ്ജലി അർപ്പിച്ചു. സംഗീതപ്രേമികളും രാഷ്ട്രീയ-സാംസ്കാരിക-ചലച്ചിത്ര രംഗത്തെ പ്രമുഖരും ആയിരക്കണക്കിന് ആരാധകരും ചേർന്നാണ് ജാനകിയമ്മയ്ക്ക് അവസാന യാത്രാമൊഴി നൽകിയത്.
മൈസൂരു മഹാരാജ കോളേജ് ഗ്രൗണ്ടിൽ പൊതുദർശനത്തിന് വെച്ച ഭൗതികശരീരത്തിൽ പതിനായിരങ്ങൾ അന്ത്യോപചാരം അർപ്പിച്ചു. തുടർന്ന് കനിയനഹുണ്ടിയിലെ ഫാംഹൗസിൽ സർക്കാർ ഔദ്യോഗിക ബഹുമതികളോടെ സംസ്കാരചടങ്ങുകൾ നടന്നു. പേരക്കുട്ടി അപ്സരയാണ് അന്ത്യകർമങ്ങൾ നിർവഹിച്ചത്. തെലുങ്ക് ബ്രാഹ്മണ ആചാരപ്രകാരമായിരുന്നു സംസ്കാരം.
ശ്വാസകോശ സംബന്ധമായ അസ്വസ്ഥതയെ തുടർന്ന് മൈസൂരു അപ്പോളോ ആശുപത്രിയിൽ ചികിത്സയിലിരിക്കെയാണ് ജാനകിയമ്മ അന്തരിച്ചത്. 17 ഭാഷകളിലായി 40,000-ത്തിലധികം ഗാനങ്ങൾ ആലപിച്ച അവർ ഇന്ത്യൻ സംഗീതലോകത്തെ ഏറ്റവും ബഹുമാനിക്കപ്പെടുന്ന പിന്നണി ഗായികമാരിൽ ഒരാളായിരുന്നു. നാല് ദേശീയ ചലച്ചിത്ര പുരസ്‌കാരങ്ങളും നിരവധി സംസ്ഥാന പുരസ്‌കാരങ്ങളും അവരുടെ സംഗീതമികവിന് അംഗീകാരമായി ലഭിച്ചു.
ആന്ധ്രപ്രദേശിലെ ഗുണ്ടൂരിൽ നിന്ന് ആരംഭിച്ച സംഗീതയാത്ര 1957-ൽ തമിഴ് സിനിമയായ വിധിയിൻ വിളയാട്ട് എന്ന ചിത്രത്തിലൂടെയായിരുന്നു. പിന്നീട് കൊഞ്ചും ചിലങ്കൈയിലെ ‘ശിങ്കാര വേലനെ ദേവ’ എന്ന ഗാനത്തിലൂടെ ദക്ഷിണേന്ത്യയുടെ പ്രിയഗായികയായി അവർ മാറി. ഉയർന്ന ശ്രുതികളെയും സൂക്ഷ്മഭാവങ്ങളെയും അനായാസം അവതരിപ്പിച്ച ശൈലിയാണ് ജാനകിയെ വേറിട്ടുനിർത്തിയത്.
മലയാളസിനിമയിൽ മിന്നുന്നതെല്ലാം പൊന്നല്ല എന്ന ചിത്രത്തിലെ ‘ഇരുൾ മൂടുകയോ എൻ വഴിയിൽ’ എന്ന ഗാനത്തിലൂടെയായിരുന്നു അരങ്ങേറ്റം. തുടർന്ന് എം.എസ്. ബാബുരാജ് ഉൾപ്പെടെയുള്ള സംഗീതസംവിധായകരോടൊപ്പം പിറന്ന അനശ്വര ഗാനങ്ങൾ മലയാളികളുടെ ഹൃദയത്തിൽ ജാനകിയമ്മയ്ക്ക് പ്രത്യേക സ്ഥാനമൊരുക്കി. മികച്ച പിന്നണി ഗായികയ്ക്കുള്ള ദേശീയ പുരസ്‌കാരം മലയാളത്തിലൂടെ നേടിയതും, ഏറ്റവും കൂടുതൽ സംസ്ഥാന പുരസ്‌കാരങ്ങൾ സമ്മാനിച്ചതും കേരളമാണ്.
തലമുറകളെ താരാട്ടുപാട്ടുകളിലൂടെയും പ്രണയഗാനങ്ങളിലൂടെയും ഭക്തിഗാനങ്ങളിലൂടെയും കണ്ണീരിൻ്റെയും സന്തോഷത്തിൻ്റെയും നിമിഷങ്ങളിൽ കൂട്ടിരുത്തിയ ആ സ്വരമാധുര്യം ഇനി ഓർമ്മകളിൽ മാത്രം. എന്നാൽ എസ്. ജാനകി പാടിയ അനശ്വര ഗാനങ്ങൾ കാലം എത്ര കഴിഞ്ഞാലും സംഗീതാസ്വാദകരുടെ ഹൃദയങ്ങളിൽ എന്നും മുഴങ്ങിക്കൊണ്ടിരിക്കും.
