ബെംഗളൂരുവിൽ കാൽനടയാത്രക്കാരുടെ സുരക്ഷ ഉറപ്പാക്കുന്നതിനായി നടപ്പാതകളിൽ തടസ്സമായി നിൽക്കുന്ന ട്രാൻസ്ഫോർമറുകളും മറ്റ് വൈദ്യുത ഉപകരണങ്ങളും മാറ്റിസ്ഥാപിക്കുന്ന പ്രത്യേക നടപടികൾ ബെസ്കോം ആരംഭിച്ചു. അപകടസാധ്യത കുറയ്ക്കുകയും നടപ്പാതകൾ കൂടുതൽ സുരക്ഷിതവും സൗകര്യപ്രദവുമാക്കുകയുമാണ് പദ്ധതിയുടെ ലക്ഷ്യം. നടപ്പാതകളിൽ സ്ഥിതി ചെയ്യുന്ന ട്രാൻസ്ഫോർമറുകൾ, വൈദ്യുത ബോക്സുകൾ, കേബിളുകൾ തുടങ്ങിയ തടസ്സങ്ങൾ കണ്ടെത്തി സുരക്ഷിതമായ ഇടങ്ങളിലേക്ക് മാറ്റുന്ന പ്രവർത്തനങ്ങളാണ് ആരംഭിച്ചിരിക്കുന്നത്.
നഗരത്തിലെ വിവിധ മേഖലകളിൽ പരിശോധന നടത്തി ഗതാഗതത്തിനും കാൽനടയാത്രയ്ക്കും തടസ്സം സൃഷ്ടിക്കുന്ന വൈദ്യുത സംവിധാനങ്ങൾ ഘട്ടംഘട്ടമായി മാറ്റിസ്ഥാപിക്കുമെന്ന് ബെസ്കോം അറിയിച്ചു. ഗ്രേറ്റർ ബെംഗളൂരു അതോറിറ്റിയുടെ ‘ഫ്രീഡം ഫ്രം വേസ്റ്റ്’ ക്യാമ്പയിനിൻ്റെ ഭാഗമായാണ് ബെസ്കോമും ഈ ദൗത്യത്തിൽ പങ്കുചേരുന്നത്. നടപ്പാതകളിലെ തടസ്സങ്ങൾ നീക്കം ചെയ്യുന്നതിലൂടെ കാൽനടയാത്രക്കാരുടെ സുരക്ഷ ഉറപ്പാക്കുകയും നഗരത്തിൻ്റെ അടിസ്ഥാന സൗകര്യങ്ങൾ കൂടുതൽ മെച്ചപ്പെടുത്തുകയും ചെയ്യുകയാണ് ലക്ഷ്യമെന്ന് അധികൃതർ അറിയിച്ചു.
