അസം നിയമസഭാ തെരഞ്ഞെടുപ്പിനുള്ള ആദ്യ പട്ടിക ബിജെപി പുറത്തിറക്കി. 88 സ്ഥാനാർത്ഥികളുടെ ആദ്യ പട്ടികയാണ് പുറത്തിറക്കിയത്. തെരഞ്ഞെടുപ്പ് പട്ടികയിൽ കോൺഗ്രസിൽ നിന്ന് അടുത്തിടെ എത്തിയ നേതാക്കൾക്ക് വലിയ പ്രാധാന്യം നൽകിയിട്ടുണ്ട്. മുഖ്യമന്ത്രി ഹിമന്ത ബിശ്വ ശർമ്മ തന്‍റെ തട്ടകമായ ജലൂക്ബാരി മണ്ഡലത്തിൽ നിന്നും തുടർച്ചയായ ആറാം തവണയും ജനവിധി തേടും.
കോൺഗ്രസിൽ നിന്ന് രാജിവെച്ച് ബിജെപിയിൽ ചേർന്ന എംപി പ്രദ്യുത് ബോർദോലോയിക്ക് ദിസ്പൂർ മണ്ഡലത്തിൽ ബിജെപി സീറ്റ് നൽകി.ബിജെപിയിൽ അടുത്തിടെ ചേർന്ന 5 കോൺഗ്രസ് നേതാക്കളിൽ നാല് പേർക്കും പട്ടികയിൽ സീറ്റ് ലഭിച്ചിട്ടുണ്ട്. ബിഹ്പുരിയ മണ്ഡലത്തിൽ നിന്നും മുൻ കോൺഗ്രസ് അധ്യക്ഷൻ ഭൂപൻ കുമാർ ബോറ മത്സരിക്കും. 88 സ്ഥാനാർത്ഥികളിൽ ആറ് പേർ സ്ത്രീകളാണ്. മന്ത്രി അജന്ത നിയോഗ് ഒഴികെയുള്ള 5 പേരും ഇതിൽ പുതുമുഖങ്ങളാണ്.
മന്ത്രി നന്ദിത ഗർലോസ, ഡെപ്യൂട്ടി സ്പീക്കർ നുമൽ മോമിൻ എന്നിവരുൾപ്പെടെ 19 സിറ്റിംഗ് എംഎൽഎമാർക്ക് ഇത്തവണ സീറ്റ് നൽകിയില്ല. മുതിർന്ന നേതാവ് സിദ്ധാർത്ഥ ഭട്ടാചാര്യയും പട്ടികയിൽ ഇല്ല. അസമിൽ ബിജെപിക്കൊപ്പം ബോഡോലാൻഡ് പീപ്പിൾസ് ഫ്രണ്ട്, അസം ഗണ പരിഷത്ത് എന്നീ പാർട്ടികളാണ് സഖ്യത്തിലുള്ളത്. ബിപിഎഫ് 11 സീറ്റുകളിലും എജിപി 26 സീറ്റുകളിലും മത്സരിക്കുമെന്ന് മുഖ്യമന്ത്രി അറിയിച്ചു.
