എയർ ഇന്ത്യ ആഭ്യന്തര വിമാന സർവീസുകളിൽ 22 ശതമാനം വരെ കുറവ് വരുത്തുന്നു. പ്രവർത്തനച്ചെലവ് വർധിച്ചതും എവിയേഷൻ ടർബൈൻ ഫ്യൂവലിൻ്റെ(ATF) വില കുത്തനെ ഉയർന്നതുമാണ് ഇത്തരത്തിലൊരു തീരുമാനമെടുക്കാൻ കാരണം. ജൂൺ മുതൽ ഓഗസ്റ്റ് വരെയുള്ള കാലയളവിലായിരിക്കും നിയന്ത്രണം നിലവിൽ വരിക. ദിവസങ്ങൾക്കു മുൻപ് അന്തർദേശീയ സർവീസുകളിൽ 27 ശതമാനം വരെ കുറവ് വരുത്തുമെന്ന് എയർ ഇന്ത്യ അറിയിച്ചിരുന്നു. ഇപ്പോൾ അതിൻ്റെ തുടർച്ചയായാണ് ആഭ്യന്തര സർവീസുകളിലും നിയന്ത്രണം കൊണ്ടുവന്നിരിക്കുന്നത്.
രാജ്യത്തെ വിവിധ നഗരങ്ങളെ ബന്ധിപ്പിക്കുന്ന ചില പ്രധാന റൂട്ടുകളിലെ സർവീസുകളുടെ എണ്ണം കുറയുകയും യാത്രക്കാർക്ക് ലഭ്യമായ വിമാന ഓപ്ഷനുകൾ പരിമിതമാകുകയും ചെയ്യും. ജൂൺ മുതൽ ഓഗസ്റ്റ് വരെയുള്ള കാലയളവിൽ തിരഞ്ഞെടുത്ത റൂട്ടുകളിലെ സർവീസുകളുടെ ആവർത്തനമാണ് കുറയ്ക്കുന്നതെന്ന് എയർ ഇന്ത്യ അറിയിച്ചു. നിലവിലെ സാഹചര്യങ്ങൾ സ്ഥിരത കൈവരിക്കുന്നതോടെ സർവീസുകൾ പഴയ നിലയിലേക്ക് പുനഃസ്ഥാപിക്കുമെന്നും കമ്പനി വ്യക്തമാക്കി.
സർവീസ് കുറവിനെ തുടർന്ന് യാത്രാ പദ്ധതികൾ ബാധിക്കപ്പെടുന്ന യാത്രക്കാർക്ക് ബദൽ വിമാനങ്ങളിൽ സീറ്റ് അനുവദിക്കുക, യാത്രാ തീയതി സൗജന്യമായി മാറ്റാൻ അവസരം നൽകുക, അല്ലെങ്കിൽ പൂർണ തുക മടക്കി നൽകുക തുടങ്ങിയ സൗകര്യങ്ങൾ ഒരുക്കുമെന്ന് എയർ ഇന്ത്യ അറിയിച്ചു. യാത്രക്കാർക്ക് നേരിടേണ്ടി വരുന്ന ബുദ്ധിമുട്ടുകൾ പരമാവധി കുറയ്ക്കാനാണ് ഈ നടപടികളെന്ന് കമ്പനി വ്യക്തമാക്കി.
പശ്ചിമേഷ്യയിലെ രാഷ്ട്രീയ സംഘർഷങ്ങളുടെ പശ്ചാത്തലത്തിൽ രൂപപ്പെട്ട വ്യോമപാത നിയന്ത്രണങ്ങളും ആഗോള എണ്ണവില വർധനവും വിമാനക്കമ്പനികളുടെ പ്രവർത്തനച്ചെലവിനെ വലിയ തോതിൽ ബാധിക്കുന്നുണ്ട്. ഇന്ത്യൻ വിമാനക്കമ്പനികളുടെ മൊത്തം പ്രവർത്തനച്ചെലവിൽ ഏകദേശം 40 ശതമാനവും ഇന്ധനച്ചെലവാണെന്നാണ് കണക്കുകൾ. നിലവിൽ എയർ ഇന്ത്യ പ്രതിവാരം ഏകദേശം 4,400 വിമാന സർവീസുകളാണ് നടത്തുന്നത്. ഇതിൽ 3,600 എണ്ണം ആഭ്യന്തര സർവീസുകളും 800 എണ്ണം അന്തർദേശീയ സർവീസുകളുമാണ്. സർവീസുകൾ കുറച്ചാലും ആഭ്യന്തര-അന്തർദേശീയ വിപണികളിൽ ശക്തമായ സാന്നിധ്യം തുടരുമെന്ന് കമ്പനി വ്യക്തമാക്കി. വേനൽക്കാല യാത്രാ സീസണിൽ സർവീസുകളുടെ എണ്ണം കുറയുന്നത് യാത്രക്കാർക്ക് കൂടുതൽ തിരക്കും ഉയർന്ന ടിക്കറ്റ് നിരക്കും ഉണ്ടാക്കാൻ സാധ്യതയുണ്ടെന്നാണ് വ്യോമയാന മേഖലയിലെ വിദഗ്ധരുടെ വിലയിരുത്തൽ. നിലവിലെ ഇന്ധനവിലയും ആഗോള സാഹചര്യങ്ങളും മെച്ചപ്പെടുന്നതുവരെ വിമാനക്കമ്പനികൾ ചെലവ് നിയന്ത്രണ നടപടികൾ തുടരുമെന്നാണു സൂചന.
