വിനോദസഞ്ചാരികളുടെ പ്രധാന ആകർഷണകേന്ദ്രമായ നന്ദി ഹിൽസിലേക്കുള്ള റോഡിൽ ഇന്ന് (നവംബർ 20) രാവിലെ ആറു മണിക്കൂർ പൊതുവാഹനങ്ങളുടെ ഗതാഗതം നിരോധിച്ചു. ബെംഗളൂരു ബൈസിക്കിൾ ചാമ്പ്യൻഷിപ്പിൻ്റെ (BBCh) ഭാഗമായി സംഘടിപ്പിക്കുന്ന കൂട്ട സൈക്ലിങ് പരിപാടിയെത്തുടർന്നാണ് ചിക്കബെല്ലാപുര ജില്ലാ ഭരണകൂടം നിയന്ത്രണം ഏർപ്പെടുത്തിയത്.

രാവിലെ ആറു മുതൽ ഉച്ചയ്ക്ക് 12 വരെയാണ് നിയന്ത്രണം. സാറ്റലൈറ്റ് ടൗൺ റിങ് റോഡ് (STRR) മുതൽ നന്ദി ഹിൽസ് വരെയുള്ള പാതയിൽ പൊതുവാഹനങ്ങൾക്ക് ഈ സമയത്ത് പ്രവേശനമുണ്ടാകില്ല. പരിപാടിയിൽ നിരവധി സൈക്ലിസ്റ്റുകൾ പങ്കെടുക്കുമെന്നാണ് പ്രതീക്ഷിക്കുന്നത്. ഇവരുടെ സുരക്ഷയും അപകടങ്ങൾ ഒഴിവാക്കുന്നതും കണക്കിലെടുത്താണ് നടപടി.

കഴിഞ്ഞ 17 വർഷമായി ബെംഗളൂരു ബൈസിക്കിൾ ചാമ്പ്യൻഷിപ്പ് ഇത്തരം സൈക്ലിങ് പരിപാടികൾ സംഘടിപ്പിച്ചുവരുന്നുണ്ട്. സൈക്ലിങ് പ്രോത്സാഹിപ്പിക്കുക, ആരോഗ്യകരമായ ജീവിതശൈലി വളർത്തുക, പരിസ്ഥിതി സൗഹൃദ യാത്രാമാർഗങ്ങളെക്കുറിച്ച് ബോധവൽക്കരണം നടത്തുക എന്നിവയാണ് പരിപാടിയുടെ ലക്ഷ്യം.

അതേസമയം, ആംബുലൻസ്, അഗ്നിശമനസേന, പൊലീസ് തുടങ്ങിയ അടിയന്തര സേവന വാഹനങ്ങൾക്ക് നിയന്ത്രണം ബാധകമല്ല. ഗതാഗത നിയന്ത്രണത്തിനായി വിവിധയിടങ്ങളിൽ പൊലീസ് ഉദ്യോഗസ്ഥരെ നിയോഗിക്കുകയും ആവശ്യമായ മുന്നറിയിപ്പ് ബോർഡുകൾ സ്ഥാപിക്കുകയും ചെയ്യും.

ഉച്ചയ്ക്ക് 12 മണിക്ക് ശേഷം വാഹനഗതാഗതം സാധാരണ നിലയിൽ പുനരാരംഭിക്കും. രാവിലെ നന്ദി ഹിൽസിലേക്ക് യാത്ര ചെയ്യാൻ പദ്ധതിയിട്ടിരുന്നവർ യാത്രാസമയം മാറ്റണമെന്നും ജില്ലാ ഭരണകൂടത്തിൻ്റെ നിർദേശങ്ങളോട് സഹകരിക്കണമെന്നും അധികൃതർ അഭ്യർഥിച്ചു.

Related Posts