യൂത്ത് ലീഗ് പ്രവർത്തകനായിരുന്ന അരിയിൽ ഷുക്കൂറിനെ കൊലപ്പെടുത്തിയ കേസിൽ ഏഴ് പ്രതികൾക്ക് ജീവപര്യന്തം തടവ് ശിക്ഷ വിധിച്ച് കോടതി. ഒന്നാം പ്രതി കെ.വി. സുമേഷ്, മൂന്നാം പ്രതി അനൂപ്, ഏഴാം പ്രതി പവിത്രൻ, ഒൻപതാം പ്രതി മനോഹരൻ, പത്താം പ്രതി ദിനേശൻ, പന്ത്രണ്ടാം പ്രതി ബിജു, പതിനഞ്ചാം പ്രതി ഷിജിൻ മോഹൻ എന്നിവരെയാണ് ശിക്ഷിച്ചത്. കൊലപാതകത്തിൽ നേരിട്ട് പങ്കുണ്ടെന്ന് കണ്ടെത്തിയതിനെ തുടർന്നാണ് എറണാകുളത്തെ പ്രത്യേക സിബിഐ കോടതി ശിക്ഷ വിധിച്ചത്.

കേസിൽ നേരത്തെ കുറ്റക്കാരെന്ന് കണ്ടെത്തിയ 13 പ്രതികളിൽ ഏഴുപേർക്കാണ് ജീവപര്യന്തം ശിക്ഷ ലഭിച്ചത്. മറ്റ് പ്രതികൾക്കുള്ള ശിക്ഷാവിധി സംബന്ധിച്ച വിവരങ്ങൾ പ്രത്യേകം പുറത്തുവരാനുണ്ട്. സിപിഎം സംസ്ഥാന സെക്രട്ടേറിയറ്റ് അംഗം പി. ജയരാജനെയും സംസ്ഥാന സമിതി അംഗം ടി.വി. രാജേഷിനെയും കോടതി നേരത്തെ വെറുതെ വിട്ടിരുന്നു. ഇരുവർക്കുമെതിരായ ഗൂഢാലോചനക്കുറ്റം തെളിയിക്കാൻ പ്രോസിക്യൂഷന് കഴിഞ്ഞില്ലെന്നാണ് കോടതിയുടെ കണ്ടെത്തൽ.

കേസിൽ ആകെ 18 പ്രതികളെ കോടതി വെറുതെ വിട്ടു. സിപിഎം സംസ്ഥാന സെക്രട്ടറി എം.വി. ഗോവിന്ദൻ്റെ മകനായ പത്തൊൻപതാം പ്രതി ശ്യാംജിത്തും വെറുതെ വിട്ടവരിൽ ഉൾപ്പെടുന്നു. ഒന്നാം പ്രതി കെ.വി. സുമേഷ് ഉൾപ്പെടെ 13 പേരെയാണ് കോടതി കുറ്റക്കാരായി കണ്ടെത്തിയത്.

2012 ഫെബ്രുവരി 20നാണ് തളിപ്പറമ്പിലെ ചുള്ളിയോട് വയലിൽവെച്ച് അരിയിൽ ഷുക്കൂർ കൊല്ലപ്പെട്ടത്. അന്നത്തെ സിപിഎം കണ്ണൂർ ജില്ലാ സെക്രട്ടറിയായിരുന്ന പി. ജയരാജനെ ആക്രമിച്ചതിൻ്റെ പ്രതികാരമായാണ് കൊലപാതകം നടത്തിയതെന്നായിരുന്നു സിബിഐയുടെ കേസ്.

തളിപ്പറമ്പ് സഹകരണ ആശുപത്രിയിലെ 315-ാം നമ്പർ മുറിയിൽവെച്ച് പി. ജയരാജനും ടി.വി. രാജേഷും ഉൾപ്പെടെയുള്ളവർ ഗൂഢാലോചന നടത്തി കൊലപാതകം ആസൂത്രണം ചെയ്തുവെന്നായിരുന്നു പ്രധാന ആരോപണം. ഇതിന്റെ അടിസ്ഥാനത്തിലാണ് ഇരുവർക്കുമെതിരെ ഗൂഢാലോചനക്കുറ്റം ചുമത്തിയത്.

കേസിൽ 82 സാക്ഷികളാണുണ്ടായിരുന്നത്. എന്നാൽ, പ്രതികൾക്കെതിരെ പൊലീസിന് മൊഴി നൽകിയ പ്രധാന സാക്ഷികളിൽ ചിലർ ഉൾപ്പെടെ കോടതിയിൽ മൊഴി നൽകാൻ എത്തിയിരുന്നില്ല. ഷുക്കൂറിൻ്റെ മാതാവ് പി.സി. ആത്തിക്ക നൽകിയ ഹർജിയെത്തുടർന്നാണ് ഹൈക്കോടതി കേസ് സിബിഐക്ക് കൈമാറിയത്. പതിനാലു വർഷത്തോളം നീണ്ട നിയമനടപടികൾക്കൊടുവിലാണ് കേസിൽ വിധി വന്നത്.

Related Posts