ഏഷ്യയിലെ ഏറ്റവും വലിയ സമ്പന്നനെന്ന പദവി വീണ്ടും സ്വന്തമാക്കി റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനി. ചൈനീസ് വ്യവസായിയും ബൈറ്റ്ഡാൻസ് സഹസ്ഥാപകനുമായ ഷാങ് യിമിങ്ങിനെ മറികടന്നാണ് അംബാനി ഒന്നാം സ്ഥാനത്തെത്തിയത്. ഫോർബ്സിൻ്റെ തത്സമയ ശതകോടീശ്വര പട്ടിക പ്രകാരം അംബാനിയുടെ ആസ്തി 10.5 ശതമാനം ഉയർന്ന് 8.52 ലക്ഷം കോടി രൂപയായി. ആഗോള സമ്പന്നരുടെ പട്ടികയിൽ അദ്ദേഹം 22-ാം സ്ഥാനത്താണ്.
84 ബില്യൺ ഡോളർ ആസ്തിയുള്ള ഷാങ് യിമിങ് 25-ാം സ്ഥാനത്തേക്ക് പിന്തള്ളപ്പെട്ടു. അദാനി ഗ്രൂപ്പ് ചെയർമാൻ ഗൗതം അദാനി 80.1 ബില്യൺ ഡോളർ ആസ്തിയുമായി 26-ാം സ്ഥാനത്തുണ്ട്.
റിലയൻസ് ഇൻഡസ്ട്രീസ് ഓഹരികളിലുണ്ടായ വൻ മുന്നേറ്റമാണ് അംബാനിയുടെ സമ്പത്തിൽ വർധനയുണ്ടാക്കിയത്. തിങ്കളാഴ്ച കമ്പനിയുടെ ഓഹരിവില ഏകദേശം 12 ശതമാനം ഉയർന്നു. ഇതോടെ വിപണിമൂല്യത്തിൽ 19 ബില്യൺ ഡോളറിലധികം വർധനയുണ്ടായി. ജൂലൈ–സെപ്റ്റംബർ പാദത്തിൽ കമ്പനി റെക്കോർഡ് സാമ്പത്തിക നേട്ടം പ്രഖ്യാപിച്ചതിനു പിന്നാലെയായിരുന്നു ഓഹരികളുടെ കുതിപ്പ്.
കമ്പനിയുടെ വരുമാനം മുൻവർഷത്തെ ഇതേ കാലയളവിനെ അപേക്ഷിച്ച് 28 ശതമാനം ഉയർന്ന് 3.62 ലക്ഷം കോടി രൂപയിലെത്തി. പ്രവർത്തന ലാഭം 24 ശതമാനം വർധിച്ച് 62,409 കോടി രൂപയായപ്പോൾ അറ്റാദായം 34 ശതമാനം ഉയർന്ന് 29,550 കോടി രൂപയായി. കമ്പനിയുടെ ചരിത്രത്തിലെ ഏറ്റവും ഉയർന്ന ത്രൈമാസ നേട്ടമാണിത്.
എണ്ണയിൽനിന്ന് രാസവസ്തുക്കൾ ഉൽപാദിപ്പിക്കുന്ന ഒ2സി വിഭാഗം, ഡിജിറ്റൽ സേവനങ്ങൾ, റീട്ടെയിൽ മേഖല എന്നിവയിലെ മികച്ച പ്രകടനമാണ് സാമ്പത്തിക വളർച്ചയ്ക്ക് കരുത്തായത്.
ഫോർബ്സിൻ്റെ 2026-ലെ ഗ്ലോബൽ 2000 പട്ടികയിൽ ലോകത്തെ ഏറ്റവും വലിയ പൊതു ഓഹരി കമ്പനികളിൽ റിലയൻസ് ഇൻഡസ്ട്രീസ് 55-ാം സ്ഥാനത്താണ്. 119.7 ബില്യൺ ഡോളർ വിൽപന വരുമാനവും 229.6 ബില്യൺ ഡോളർ ആസ്തിയും 9.1 ബില്യൺ ഡോളർ ലാഭവുമാണ് കമ്പനി രേഖപ്പെടുത്തിയിരിക്കുന്നത്.
